जळगाव (प्रतिनिधी) शिवसेना पक्षप्रमुख उद्धव ठाकरे यांनी संघटनात्मक बांधणीसंदर्भात चार उपनेत्यांच्या नियुक्त्यांची घोषणा केली.
यात गुलाबराव वाघ (जळगाव), सचिन घायाळ (जालना, पैठण), दत्ता गायकवाड (नाशिक), सुरेंद्रनाथ (बाळ) माने (रत्नागिरी-कोकण) यांना उपनेतेपदी संधी देण्यात आली आहे. शिवसेना मध्यवर्ती कार्यालयातून प्रसिद्ध केलेल्या पत्रकात या नियुक्त्यांबाबत माहिती देण्यात आली. गुलाबराव वाघ यांच्यावर उपनेते पदाबरोबरच रावेर (लोकसभा) व नंदुरबार जिह्याच्या संपर्क प्रमुख पदाची जबाबदारीही सोपवण्यात आली आहे.
नाशिक महानगर प्रमुख विलास शिंदे यांच्यासह दहा ते बारा पदाधिकारी पक्षात नाराज असल्याचा दावा सुधाकर बडगुजर यांच्या वतीने करण्यात आला होता. यानंतर बडगुजर यांची पक्षातून हकालपट्टी करण्यात आली होती. त्यानंतर आता ठाकरे गटाच्या वतीने दुसरा महत्त्वाचा निर्णय घेण्यात आला आहे. यामध्ये राज्यातील चार प्रमुख नियुक्त्या करण्यात आल्या आहेत.
