मुंबई (वृत्तसंस्था) शिवसेना खासदार भावना गवळी यांना सक्तवसुली संचलनालय अर्थात ईडीकडून समन्स धाडण्यात आले आहे. त्यानुसार भावना गवळी यांना पुढील आठवड्यात ईडीच्या (ED) चौकशीसाठी हजर राहण्याचे आदेश देण्यात आले आहेत.चौकशीला हजर न राहिल्यास भावना गवळी (Bhavana Gawali) यांच्याविरोधात अजामीनपात्र वॉरंट काढले जाण्याची शक्यताही सूत्रांकडून वर्तविण्यात आली आहे.
खासदार गवळी यांना ED कडून यापूर्वीही समन्स बजावण्यात आले होते. पण काही कारणामुळे येऊ शकत नाही, असं त्यांनी ED ला कळवलं होतं. त्यामुळे आता भावना गवळी चौकशीला हजर राहतात का, ते पाहणं महत्त्वाचं आहे.
शिवसेना खासदार भावना गवळींच्या महिला उत्कर्ष प्रतिष्ठान ट्रस्टमधील गैरव्यवहार प्रकरणी ईडीने नोव्हेंबर महिन्यात आरोपपत्र दाखल केलं होतं. या कथित गैरव्यवहारप्रकरणी सईद खान हे भावना गवळी यांचे निकटवर्तीय ED च्या अटकेत आहेत. त्याची 3.5 कोटी रूपयांची मालमत्ता ईडीने तात्पुरती जप्त केली आहे.
सईद खान महिला उत्कर्ष प्रतिष्ठान ट्रस्टचे संचालक आहेत. ईडीच्या दाव्यानुसार, महिला उत्कर्ष प्रतिष्ठान ट्रस्टला कंपनीत बदलण्याचं षड्यंत्र विचारपूर्वक रचलेलं होतं. ट्रस्टमधून पैशांची अफरातफर करण्यासाठी हे करण्यात आल्याचं ईडीचं म्हणणं आहे.
ईडीनं जारी केलेल्या प्रसिद्धी पत्रकात म्हटलंय की, जप्त करण्यात आलेली मालमत्ता ट्रस्टमधून अफरातफर करण्यात आलेल्या पैशातून विकत घेण्यात आल्याचं चौकशीत समोर आलं आहे. ईडीने 11 मे रोजी महिला उत्कर्ष प्रतिष्ठानशी संबंधितांविरोधात मनी लॅांडरिंगचा गुन्हा दाखल केला होता. या प्रकरणी ईडीनं भावना गवळी यांना तीन समन्स बजावली आहेत. पण त्या चौकशीसाठी हजर झालेल्या नाहीत.
