पहूर ता. जामनेर (प्रतिनिधी) परीक्षेचे हॉल तिकीट घेण्यासाठी फर्दापूर येथे गेलेल्या भुसावळ येथील विद्यार्थ्याचा हृदयविकाराच्या तीव्र झटक्याने मृत्यू झाला. ही घटना फर्दापूर येथे शुक्रवारी दुपारी घडली. हर्षल सतीष बाणाईत (वय २२) असे मृत तरुणाचे नाव आहे.
हर्षल हा फर्दापूर (ता. सिल्लोड) येथील महाविद्यालयात बीसीएच्या दुसऱ्या वर्षात शिक्षण घेत होता. दि. २१ पासून परीक्षा सुरू होणार असल्याने हर्षल हा लोकेश दिलीप रडे या मित्रासह घरून निघाला. महाविद्यालयात दुपारी हॉल तिकीट घेतले व घराकडे निघत असतानाच त्याला महाविद्यालयातच भोवळ आली. त्यात हर्षल खाली कोसळला. त्याला वाकोद येथील प्राथमिक आरोग्य केंद्रात आणण्यात आले. तिथून पहूर ग्रामीण रुग्णालयात आणले. पहूर ग्रामीण रुग्णालयात असता वैद्यकीय अधिकारी डॉ. यासीर खान यांनी त्यास मृत घोषित शवविच्छेदनाच्या अहवालानुसार, हृदयविकाराच्या धक्क्याने त्याचा मृत्यू झाल्याचे कळते. याप्रकरणी पहूर पोलिसात अकस्मात मृत्यूची नोंद करण्यात आली.
