एरंडोल (प्रतिनिधी) रिंगणगाव येथून बेपत्ता झालेल्या १३ वर्षीय मुलाचा मृतदेह गळा चिरलेल्या अवस्थेत एरंडोल तालुक्यातील खर्ची गावाजवळील शेतात मंगळवार, १७ जून रोजी सकाळी ८ वाजता आढळून आला. या घटनेने तालुक्यासह संपूर्ण जिल्ह्यात खळबळ उडाली असून, एरंडोल पोलीस तपास करत आहेत.
मयत मुलाचे नाव तेजस गजानन महाजन (वय १३, रा. रिंगणगाव, ता. एरंडोल) असे आहे. तो आपल्या आई-वडिलांसह व मोठ्या बहिणीसोबत रिंगणगाव येथे राहत होता. वडील गजानन महाजन हे शेती आणि हार्डवेअर दुकान चालवत कुटुंबाचा उदरनिर्वाह करतात. सोमवार, १६ जून रोजी गजानन महाजन यांनी तेजसला दुकानावर ठेवून स्वतः काही कामानिमित्त जळगावला गेले होते. तेजसने दुकान बंद करून घरी परत यावे, अशी कुटुंबीयांची अपेक्षा होती. मात्र, तेजस घरी न परतल्याने शोधाशोध सुरू झाली. त्या दिवशी गावाचा आठवडी बाजार असल्याने तो गर्दीत हरवला असावा, अशीही शक्यता व्यक्त करण्यात आली.
ग्रामस्थांना एका मुलाचा गळा चिरलेला मृतदेह आढळला
कुटुंबीयांनी एरंडोल पोलीस ठाण्यात तक्रार दाखल केली. पोलीस निरीक्षक निलेश गायकवाड यांच्या मार्गदर्शनाखाली रात्रीभर शोध मोहीम राबविण्यात आली. अखेर मंगळवारी सकाळी खर्ची गावाजवळील निंबाळकर यांच्या शेतात ग्रामस्थांना एका मुलाचा गळा चिरलेला मृतदेह दिसून आला. पोलिसांनी घटनास्थळी जाऊन तपासणी केली असता, तो मृतदेह तेजस महाजन याचाच असल्याची खात्री झाली. ही घटना कुटुंबावर आघात करणारी असून परिसरात हळहळ व्यक्त केली जात आहे. घटनास्थळी फॉरेन्सिक मोबाईल व्हॅन दाखल झाली असून, पोलीस तपास सुरू आहे.
