मनमाड (वृत्तसंस्था) मनमाड रेल्वे स्थानकात टोळक्याने मिळून एकाची धारदार शस्त्राने वार करत हत्या केल्याची घटना उघडकीस आली आहे. ऐन भाऊबीजेच्या दिवशीच एकुलत्या एक भावाची हत्या करण्यात आल्याने हळहळ व्यक्त केली जात आहे. रेल्वे स्थानकावर नंदीग्राम एक्स्प्रेस उभी असताना हा खून करण्यात आला आहे.
यासंदर्भात अधिक असे की, हत्या झालेल्या युवकाचे नाव शिवम पवार असे असून त्याला तीन बहिणी आहेत. रेल्वे स्थानकावर नंदीग्राम एक्स्प्रेस उभी होती त्यावेळी ४ ते ५ तरुणांनी शिवम याच्यावर धारदार शस्त्राने ५ ते ६ वार केले. या हल्ल्यात शिवम गंभीर जखमी झाला, त्याला तातडीने उपजिल्हा रुग्णालयात दाखल करण्यात आले मात्र तो पर्यंत त्याचा मृत्यू झाला होता. हल्ला केल्यानंतर मारेकरी नंदीग्राम एक्स्प्रेसने मुंबईकडे फरार झाले.
प्रेम प्रकरणातून ही हत्त्या करण्यात आल्याची प्राथमिक माहिती असून हत्त्या करण्यात आली तेव्हा मुलगी देखील त्या ठिकाणी होती. संबंधित मुलीला पोलिसांनी ताब्यात घेऊन चौकशी करत आहेत. चौकशीनंतर या हत्याकांडामागचे नेमकं कारण काय याचा उलगडा होईल. शिवमला ३ बहिणी असून भाऊबाजीच्या दिवशी भावाची हत्या झाल्यामुळे त्यांच्यावर दुःखाचे डोंगर कोसळले आहे. या प्रकरणी रेल्वे पोलिसांनी गुन्हा दाखल केला असून पुढिल तपास पोलिस करत आहेत.
