चाळीसगाव (प्रतिनिधी) जिल्हा पोलिस अधीक्षक डॉ. प्रवीण मुंढे यांनी शुक्रवारी शहर ठाण्याचे पोलिस निरीक्षक के. के. पाटील यांची नियंत्रण कक्षात बदली केली आहे. दोन कर्मचाऱ्यांना गेल्या आठवड्यात लाच प्रकरणात अटक करण्यात आल्यानंतर पोलीस अधीक्षकांनी ही कारवाई करण्यात आल्याची चर्चा आहे.
एका विवाहितेच्या छळ प्रकरणी दाखल असलेल्या गुन्ह्यात मदत करण्यासह दोषारोपपत्र लवकर न्यायालयात सादर करण्याच्या मोबदल्यात पाच हजारांची स्वीकारल्या प्रकरणी चाळीसगाव शहर पोलिस ठाण्यातील सहाय्यक फौजदार अनिल रामचंद्र अहिरे व पोलिस नाईक शैलेश आत्माराम पाटील यांना २८ जून रोजी जळगाव एसीबीच्या पथकाने अटक केली होती. त्यामुळे कर्मचाऱ्यांवर अंकुश ठेवण्यात अपयशी ठरल्याचा ठपका पोलीस निरीक्षक के. के. पाटील यांच्यावर ठेवण्यात आलाय. त्यामुळे त्यांची शुक्रवारी तातडीने नियंत्रण कक्षात बदली करण्यात आली. दरम्यान, चाळीसगाव शहर पोलिस ठाण्याचा तात्पुरता पदभार ग्रामीणचे निरीक्षक संजय ठेंगे यांच्याकडे सोपवण्यात आला आहे. दरम्यान, पोलीस निरीक्षक पाटील हे गेल्या आठवड्यात अमरनाथ यात्रेला गेले होते. तेथून आल्यानंतर त्यांची तब्येत बरी नसल्याने ते नाशिक येथे असतांना त्यांना बदलीचे आदेश प्राप्त झाल्याचे कळते. शहरात एका कीर्तनाच्या कार्यक्रमात नारदाच्या गादीवर पाय ठेवल्याच्या घटनेमुळे पोलिस निरीक्षक पाटील चर्चेत होते. दरम्यान, प्रशासकीय कारणावरून त्यांना पुढील आदेशापर्यंत नियंत्रण कक्षाशी संलग्न केल्याचे आदेशात नमूद करण्यात आले आहे.
