वर्धा (वृत्तसंस्था) जिल्ह्यात गिरड पोलीस ठाण्याच्या हद्दीत येत असलेल्या सिल्ली गावात एका नराधमाने तीन अल्पवयीन मुलींवर अंधाराचा फायदा घेत शारिरिक अत्याचार केल्याची संतापजनक घटना घडलीय. केशव वानखेडे (वय ५५) असे अटक केलेल्या आरोपीचे नाव आहे.
आरोपी केशव वानखेडे हा लोखंडी पिंप विक्रीचं काम करतो. तो गिरड पोलीस ठाण्याच्याअंतर्गत येणाऱ्या एका गावात विक्रीसाठी आला होता. यादरम्यान गावातील रस्त्याच्या कडेला थांबून तो पिंप विकत असताना त्याची नजर दोन सख्ख्या अल्पवयीन बहिणींवर पडली. नराधम काळोखाचा फायदा घेत अल्पवयीन मुलींना जवळच रस्त्याच्या कडेला असलेल्या एका ओसाड जागेवरील बाथरुममध्ये घेऊन गेला. या ठिकाणी आरोपीने दोन्ही मुलींवर लैंगिक अत्याचार केला. धक्कादायक म्हणजे यानंतर त्याने आणखी एका मुलीला आपल्या वासनेचा शिकार बनवलं. घडलेल्या प्रकाराबद्दल मुलींनी आपल्या पालकांना माहिती दिल्यानंतर त्यांनी या प्रकरणात पोलीस तक्रार दाखल केली.
