मुंबई (वृत्तसंस्था) लग्नाच्या काही दिवसांनंतरच मुलीच्या पोटात दुखू लागले आणि त्यानंतर पतीने तिला वैद्यकीय तपासणीसाठी रुग्णालयात नेलं. मात्र, डॉक्टरांनी तपासणी केली असता धक्कादायक माहिती समोर आली. यावेळी पीडित मुलीने जे सांगितलं ते ऐकून सर्वांच्याच पायाखालची वाळू सरकली. पीडित मुलीवर तिच्याच बापाने वारंवार बलात्कार केल्याचं समोर आलं आहे.
पोलिसांनी दिलेल्या माहितीनुसार, पीडित मुलीवर तिच्याच बापाने वारंवार बलात्कार केल्याचं समोर आलं आहे. पीडित मुलीने सांगितलं की, लग्नाच्या दोन आठवड्यांपूर्वी सुद्धा वडिलांनी माझ्यावर बलात्कार केला. लग्नानंतर फेब्रुवारी महिन्यात पीडित मुलीच्या पोटात दुखू लागले त्यानंतर तिचा पती आणि सासरच्यांनी तिला रुग्णालयात नेलं. त्यानंतर सोनोग्राफी करण्यात आली असता ती गरोदर असल्याचं समोर आलं.
पीडित मुलीने पोलिसांना सांगितले, २०१९ पासून वडील तिच्यावर बलात्कार करत होते. आई नातेवाईकांकडे कार्यक्रमाला गेली होती तेव्हा माझ्या वडिलांनी मला शिवीगाळ करण्यास सुरुवात केली. त्यानंतर त्यांनी माझ्यावर जबरदस्ती केली. आरोपी हा एक रिक्षाचालक आहे. गेल्या तीन वर्षांपासून तो आपल्या पोटच्या मुलीवर बलात्कार करत होता. पीडित मुलीने घडलेला प्रकार आपल्या आईला आणि बहिणीला सांगितला. पण त्यांनी तिला गप्प राहण्यास सांगितले.
गेल्या वर्षाच्या अखेरिस पीड़ित मुलीच्या पोटात दुखू लागल्याने तिला तिच्या आईने आणि काकूने डॉक्टरांकडे नेलं. तसेच ती गरोदर आहे हे तिला न सांगता गर्भपात करण्यासाठी तिला गोळ्या देण्यात येत होत्या. तिच्या नकळत बाळाचा गर्भपात होईल यासाठी आई तिला गोळ्या देत होती मात्र, तसे झाले नाही. त्यानंतर लग्न झाल्यावर हा संपूर्ण प्रकार उघडकीस आला. या घटनेने एकच खळबळ उडाली आहे. या घटनेप्रकरणी पोलिसांनी आरोपी रिक्षाचालकाच्या विरोधात गुन्हा दाखल केला असून पोलिसांनी त्याला अटक केली आहे. आरोपीने आपला गुन्हा कबूल केला असून आता या प्रकरणात पुढील कारवाई करत आहेत.