नागपूर (वृत्तसंस्था) नागपूरमधील जरीपटक्यातील कस्तुरबा नगरात धक्कादायक घटना उघडकीस आली आहे. भाडेकरुच्या धमक्यांना त्रासून घर मालकाने गळफास घेऊन आत्महत्या केली आहे. आत्महत्या करण्यापूर्वी घरमालकाने व्हिडीओ तयार केला आहे. याप्रकरणी पोलिसांनी आरोपी भाडेकरू आणि त्याच्या भावाविरोधात गुन्हा दाखल केला आहे. मुकेशकुमार श्रीचंद रिजवानी असं आत्महत्या केलेल्या ४६ वर्षीय घरमालकाचं नाव आहे.
घरमालकाला जीवे मारण्याची धमकी
मिळालेल्या माहितीनुसार, मृत रिजवानी हे जरीपटक्यातील कस्तुरबा नगरातील रहिवासी होते. त्याचा नाष्टा सेंटरचा व्यवसाय होता. मृत रिजवानी यांनी काही वर्षांपूर्वी आरोपी राजेश ऊर्फ राजा नामोमल सेतिया याला दोन खोल्या भाड्याने दिल्या होत्या. आरोपी सेतिया हा ठरल्याप्रमाणे रिजवानी यांना घरभाडं देत नव्हता. भाडं मागितल्यास आरोपी घरमालकाला शिवीगाळ करून ठार मारण्याची धमकी द्यायचा.
घर रिकामं करण्यासाठी दहा लाख रुपयांची मागणी
एवढंच नव्हे तर, आरोपी राजेशचा भाऊ वेगवेगळ्या विभागात तक्रारी देऊन घरमालक रिजवानी यांना त्रास देत होता. सततच्या त्रासाला कंटाळून रिजवानी यांनी सप्टेंबर २०१९ मध्ये आरोपींना घर खाली करण्यास सांगितलं. पण आरोपींनी घर खाली करण्याऐवजी घरमालकाकडे घर सोडण्यासाठी दहा लाख रुपयांची खंडणी मागितली. आरोपींच्या दबावाला बळी पडून रिजवानी यांनी आरोपींना साठ हजार रुपये दिले. पण आणखी पैसे मिळावे यासाठी आरोपी घरमालकाचा छळ करत होते.
व्हिडीओ व्हायरल करून आत्महत्या
आरोपींकडून सतत होणाऱ्या त्रासाला कंटाळून पीडित घरमालक रिजवानी यांनी ६ ऑक्टोबर रोजी सायंकाळी गळफास घेऊन आत्महत्या केली आहे. आत्महत्या करण्यापूर्वी रिजवानी यांनी एक व्हिडीओ सोशल मीडियावर व्हायरल केला आहे. या व्हिडीओमधून त्यांनी आत्महत्येसाठी जबाबदार असणाऱ्या व्यक्तींचा उल्लेख केला आहे. तसेच आरोपींकडून होणाऱ्या त्रासाबद्दलही सांगितलं आहे. यामध्ये एका वकिलाचाही समावेश आहे. याप्रकरणी जरीपटका पोलीस ठाण्यात गुन्हा दाखल केला आहे. दोन्ही मुख्य आरोपी फरार असून पोलीस त्यांचा शोध घेत आहेत.