जळगाव प्रतिनिधी । ई-मेल आयडी आणि इंस्टाग्राम खाते हॅक करून दोघांचा ॲक्सेस घेत विनापरवानगी खात्यावरून तरुणीचे फोटो अपलोड करून बदनामी करत लग्न मोडल्याचा धक्कादायक प्रकार समोर आला आहे. याप्रकरणी बुधवारी २४ जुलै रोजी दुपारी ३ वाजता जळगाव सायबर पोलीस ठाण्यात अज्ञात व्यक्ती विरोधात गुन्हा दाखल करण्यात आला आहे.
यासंदर्भात मिळालेली माहिती अशी की, जामनेर तालुक्यातील एका गावात २५ वर्षीय तरुणी ही आपल्या कुटुंबासह वास्तव्याला आहे. दरम्यान ३१ जानेवारी ते २४ जुलै या कालावधीत अज्ञात व्यक्तीने त्यांचा ईमेल आयडी आणि इंस्टाग्राम खाते हॅक करून त्याचा ॲक्सेस घेतला. त्यानुसार त्याने ई-मेलवरील मोबाईल नंबर बदलवला. त्यानंतर त्याने तरुणीच्या ईमेलवर असलेले फोटो इंस्टाग्रामवर फोटो व्हायरल करून तिची बदनामी झाल्याने तरूणीचे लग्न मोडले. हा प्रकार लक्षात आल्यानंतर पीडित तरुणीने बुधवारी २४ जुलै रोजी जळगाव येथील जळगाव सायबर पोलीस ठाण्यात धाव घेत अज्ञात व्यक्ती विरोधात तक्रार दिली. याप्रकरणी दुपारी ३ वाजता जळगाव सायबर पोलीस ठाण्यात अज्ञात व्यक्ती विरोधात गुन्हा दाखल करण्यात आला आहे. या घटनेचा पुढील तपास पोलीस निरीक्षक मुरलीधर कासार हे करीत आहे.
