धरणगाव (प्रतिनिधी) येथून जवळच राजवड (ता. पारोळा) शिवारात बिबट्या दिसून आल्याने परिसरातील शेतकऱ्यांमध्ये भीतीचे वातावरण निर्माण झाले आहे. याबाबत परिसरातील गावांमध्ये दवंडी देत नागरिकांना सावधानतेचा ईशारा देण्यात आला आहे.
राजवड शिवारात शनिवारी सायंकाळी रस्त्यावर बिबट्या दिसून आला. याचवेळी एक बस देखील पारोळा जात होती. त्यामुळे अनेकांनी बिबट्याला बघितल्याचे सूत्रांनी सांगितले. दरम्यान, याबाबतची माहिती शेतकऱ्यांनी माजी आमदार कृषिभूषण साहेबराव पाटील यांना सांगितली. साहेबराव पाटील यांनी तात्काळ पारोळा, अमळनेर आणि धरणगाव तालुक्यातील वन विभागाच्या अधिकाऱ्यांशी संवाद साधला. यानंतर वन विभागाने बिबट्या दिसून आल्याच्या आजूबाजूच्या गावांमध्ये दवंडी फिरवीत शेतकरी, शेतमजूर आणि नागरिकांमध्ये सावधानतेचा ईशारा दिला आहे. दरम्यान, बिबट्याला पकडून जेरबंद करण्याची मागणी ग्रामस्थांनी केली आहे.
