धरणगाव (प्रतिनिधी) खेळ हे जीवन समृद्ध करतात, मानसिक आणि शारीरिक विकास घडवतात. खेळाचे महत्त्व ओळखून विद्यार्थ्यांनी जीवनाचा आनंद लुटला पाहिजे,असे प्रतिपादन पोलिस निरीक्षक उद्धव ढमाले यांनी पी.आर.हायस्कूलमध्ये वार्षिक क्रीडा महोत्सव आणि स्काऊट व गाईड आनंद मेळाव्याच्या उद्घाटनप्रसंगी केले.
या कार्यक्रमाच्या अध्यक्षस्थानी संस्थेचे अध्यक्ष डॉ.अरूण कुलकर्णी हे होते तर मंचावर राज्य व्हाॅलिबाॅल संघाचे चेअरमन तथा माजी विद्यार्थी रवींद्र कंखरे, सचिव डॉ. मिलिंद डहाळे, मुख्याध्यापक डॉ. संजीवकुमार सोनवणे, पर्यवेक्षक कैलास वाघ, उमाकांत बोरसे, डॉ. बी.डी.शिरसाठ हे उपस्थित होते. मान्यवरांच्या हस्ते क्रीडा ज्योत प्रज्वलित करून आणि क्रीडांगणाचे पुजन करून उद्घाटन करण्यात आले. रवींद्र कंखरे यांनी शाळेच्या व्हाॅलिबाॅल संघाला वर्षभरात लागणारे सर्व साहित्य देऊन मुले आणि मुलींचा संघ दत्तक घेत असल्याची घोषणा केली. डॉ. डहाळे आणि डॉ. कुलकर्णी यांनी खेळाडूंना मार्गदर्शन केले. कार्यक्रमाचे प्रास्ताविक डॉ. संजीवकुमार सोनवणे यांनी केले.
यावेळी स्काऊट व गाईड पथकांनी खरी कमाई अंतर्गत आनंद मेळावा आयोजित केलेल्या मेळाव्यात विविध खाद्यपदार्थांचे आणि मनोरंजक क्रीडा प्रकारांचे स्टाॅल लावण्यात आले होते. विद्यार्थी आणि पालकांनी मेळाव्याचा मनमुराद आनंद लुटला. क्रीडा स्पर्धेत व्हाॅलिबाॅल, खो खो, कबड्डी, रिले, डाॅस बाॅल अशा क्रीडा प्रकारात विद्यार्थी खेळाडूंनी उस्फुर्त सहभाग नोंदविला. कार्यक्रमाचे सूत्रसंचालन संजय बेलदार यांनी तर आभारप्रदर्शन क्रीडा शिक्षक डी.एच.कोळी यांनी केले. यावेळी क्रीडा शिक्षक वाय.ए. पाटील, एनसीसी अधिकारी डी.एस.पाटील , कर्मचारी राजेंद्र पवार, प्रवीण तिवारी, नितीन बडगुजर यांनी सहकार्य केले.
