मुंबई (वृत्तसंस्था) भारताची बॅडमिंटन स्टार सायना नेहवाल ला कोरोनाची लागण झाली आहे. सायना बॅडमिंटन स्पर्धा खेळण्यासाठी थायलंडला आली आहे, तिकडच्याच रुग्णालयात सायनाला क्वारंटाईन करण्यात आलं आहे. कोरोना रिपोर्ट पॉझिटिव्ह आल्यामुळे हा सायनासाठी मोठा धक्का आहे.
भारताची फुलराणी सायना नेहवालला कोरोना व्हायरसची लागण झाली आहे. दरम्यान, कोरोना व्हायरसच्या महामारीमुळे बऱ्याच काळापासून आंतरराष्ट्रीय सामने रद्द करण्यात आले होते. त्यानंतर हळूहळू सर्व गोष्टी पुर्वपदावर येत आहेत. अशातच आता सायना नेहवाल थायलँड ओपन सुपर १००० टुर्नामेंटमध्ये सहभागी होणार आहे. ही स्पर्धा १२ ते १७ जानेवारीपर्यंत सुरु राहणार आहे. परंतु, आता कोरोनाची लागण झाल्यामुळे सायनाच्या खेळण्यावर प्रश्नचिन्ह आहे. याआधी सायना नेहवाल बँकॉकमध्ये होणाऱ्या या स्पर्धांबाबत असलेल्या प्रतिबंधांबाबत समाधानी नव्हती. कोविड-१९ प्रोटोकॉल अंतर्गत लावण्यात आलेल्या निर्बंधांवर नाराजी व्यक्त करत ट्वीट केलं होतं. सायनाने ट्वीट केलं की, “तपासणीमध्ये सर्व निगेटिव्ह आल्यानंतरही फिजियो आणि प्रशिक्षक आम्हाला भेटू शकत नाहीत? आम्ही चार आठवड्यांपर्यंत स्वतःला फिट कसे ठेवणार. आम्हाला चांगल्या परिस्थिती खेळायचं आहे. कृपया यावर मार्ग काढा.” सायनाने ट्रेनर आणि फिजियोला भेटण्याची परवानगी न दिल्यामुळे वर्ल्ड बॅडमिंटन महासंघावर (BWF) टीका केली होती. खेळाडूंना याबाबत आधीच माहिती द्यायला पाहिजे होती, असं सायना नेहवाल म्हणाली होती. थायलंडमध्ये सायनाला तिच्या सपोर्ट स्टाफला भेटण्याची परवानगी मिळाली नव्हती. भारतीय टीममध्ये सायना नेहवाल, किदांबी श्रीकांत आणि बी. साई प्रणित आहेत. तर वर्ल्ड चॅम्पियन पीव्ही सिंधू इंग्लंडवरून थेट थायलंडला रवाना झाली होती. सिंधू ऑक्टोबरपासून इंग्लंडमध्ये सराव करत आहे.
