ठाणे (प्रतिनिधी) देशभरात पत्रकार हित जोपासून पत्रकारांच्या न्याय हक्कासाठी लढत असलेली व भारत सरकार मान्यताप्राप्त आयडीयल जर्नलिस्ट असोसिएशन या पत्रकार संघटनेची राज्यस्तरीय बैठक दि. २३ जुलै २०२१ रोजी लाईटब्रीज हिरानंदानी मिडोज, ठाणे पश्चिम (मुंबई) येथे महाराष्ट्र प्रभारी अजयकुमार मिश्र यांच्या मार्गदर्शनाखाली पार पडली.
बैठकीस महाराष्ट्र प्रदेश महासचिव आबासाहेब सूर्यवंशी (पाचोरा), प्रदेश सरचिटणीस सुर्यकांत कदम (चाळीसगाव), प्रदेश उपाध्यक्ष किशोर बोराटे (सातारा), प्रदेश संपर्क प्रमुख सचिन शिंदे (ठाणे), महाराष्ट्र प्रदेश विधी सल्लागार ॲड. मंगेश तिरोडकर (ठाणे), वाई तालुका अध्यक्ष शशिकांत शिंदे उपस्थित होते.
यावेळी महाराष्ट्र राज्यात संघटनेची वाटचाल आणि ध्येयधोरणे बाबत महाराष्ट्र अध्यक्ष तथा प्रभारी अजयकुमार मिश्र यांनी माहिती दिली तर प्रदेश महासचिव आबासाहेब सूर्यवंशी यांनी सातारा येथे ३ ऑक्टोबर २०२१ रोजी होणाऱ्या राष्ट्रीय अधिवेशनाबाबत पूर्वतयारी आणि विचारविनिमय याबाबत मार्गदर्शन करून संघटनेबाबत माहिती दिली. व पत्रकार बांधवांच्या मागण्या व समस्यांबाबत लवकरच मुख्यमंत्री उद्धव ठाकरे, उपमुख्यमंत्री अजित पवार व विरोधी पक्षनेते देवेंद्र फडणवीस यांना निवेदन देण्याबाबत चर्चा केली.
राष्ट्रीय अधिवेशन संदर्भात राज्यभरातील पदाधिकारी व सदस्यांनी उपस्थित राहण्याचे आवाहन प्रदेश सरचिटणीस सुर्यकांत कदम यांनी केले. तर प्रदेश उपाध्यक्ष किशोर बोराटे यांनी येणाऱ्या काळात संघटना बळकट करण्यासाठी पदाधिकारी व सदस्यांनी जोमाने कामाला लागावे, असे सांगत मोलाचे मार्गदर्शन केले.
आभार प्रदेश संपर्क प्रमुख सचिन शिंदे यांनी मानले. यावेळी राज्याच्या विधी व न्याय सल्लागार प्रमुखपदी ॲड. मंगेश तिरोडकर, महाराष्ट्र महिला प्रदेश अध्यक्षपदी पत्रकार नूर बानो (मुंबई), महिला प्रदेश कार्याध्यक्षपदी पत्रकार मधू आचार्य (ठाणे), कलामंच महाराष्ट्र प्रदेश सचिवपदी अभिनेता साहेबराव काळे (चाळीसगाव) यांची नियुक्ती करून संघटनेच्यावतीने त्यांचा सत्कार केला. तसेच पुढील वाटचालीस शुभेच्छा दिल्या.
