जळगाव (प्रतिनिधी) शहर वाहतूक शाखेने गुरुवारी शहरात कडक कारवाई सुरू केली असून गोलाणी मार्केट, टॉवर चौक, नगरपालिका क्षेत्रात अनियंत्रित पार्किंग, वाहन चालविताना मोबाईलवर बोलणे, ट्रिपल शीट, नो एट्रींमध्ये प्रवेश करणाऱ्या, वाहतुकीच्या नियमांचे उल्लंघन करणाऱ्या एकूण ४३० वाहनांवर कारवाई करण्यात आली. अशी माहिती शहर वाहतूक शाखेचे पोलीस निरीक्षक देविदास कुनगर यांनी दिली. या कारवाईमुळे शहर वाहतूक शाखेच्या कारवाईने शहरात एकच खळबळ उडाली होती.
या कारवाईतून ४५ हजार २०० रुपयांचा दंड वसूल करण्यात आला. तर या काही वाहनधारकांना दंड भरण्यास मुभा देण्यात आल्याने ७५ हजार एवढा दंड वसूल करणे बाकी असल्याचं माहिती कुनगर यांनी बोलतांना सांगितले.
पोलिस अधीक्षक डॉ.प्रवीण मुंढे यांच्या आदेशाने शहर वाहतूक शाखेचे पोलिस निरीक्षक देविदास कुनगर यांच्या मार्गदर्शनाखाली पोलीस उपनिरिक्षक दिलीप पाटील, पोलीस कॉस्टेबल फिरोज तडवी, शशीकांत मराठे, गणेश लाठे, मुरलीधर पाटील, महिला पोलीस मनिषा विसपुते, मोहसीन खान, उदय सोनवणे यांच्या पथकाने शहरात गुरुवारी सकाळपासून कारवाईची धडक मोहिम राबविण्यात आली. गोलाणी मार्केट येथे एकेरी वाहतूक असतांना, नियम न पाळता वाहतूक करणार्‍या वाहन धारकांवर कारवाई करण्यात आली.
या कारवाईत वाहनधारकांकडून प्रत्येकी 200 रुपयांचा दंड वसूल करण्यात आला. यानंतर शहरातील टॉवर चौक तसेच महापालिका परिसरात कारवाईसाठी मोर्चा वळविण्यात आला. यात वाहतुकीस अडथळा निर्माण करणारी बेशिस्त वाहने, वाहन चालवितांना मोबाईलवर बोलणे, ट्रीपल सिट, परवाना न बाळगणे याप्रमाणे वाहतूक नियमांचे उल्लंघन करणार्‍या वाहनधारकांवर कारवाई करण्यात आली. दिवसभरात एकूण ४३० वाहनधारकांवर कारवाई करण्यात येवून 45 हजार 200 रुपयांचा दंड वसूल करण्यात आला. तर 75 हजारांचा दंड वसूल करणे बाकी आहे.
