धरणगाव (प्रतिनिधी) धरणगावात तात्काळ उपजिल्हा रुग्णालय मंजूर करावे, अशी मागणी भाजप ओबीसी आघाडीचे जिल्हाध्यक्ष अॅड. संजय महाजन यांनी नुकतीच केली होती. ना. गुलाबराव पाटील यांनी याची तात्काळ दखल घेत लवकरच धरणगावात उपजिल्हा रुग्णालय सुरु होणार असल्याची माहिती अॅड : महाजन यांना दिली आहे.
शहरात उपजिल्हा रुग्णालय व ग्रामीण रुग्णालयात मुबलक सोयी सुविधा उपलब्ध नसल्याने शहरासह तालुक्यातील नागरिकांना मोठ्या समस्यांना सामोरे जावे लागत होते. याबाबत भाजपा ओबीसी सेल जिल्हाध्यक्ष अॅड. संजय महाजन यांनी आठ दिवसापूर्वी मंत्री ना. गुलाबराव पाटील यांच्याशी संपर्क साधला होता आणि तात्काळ उपजिल्हा रुग्णालय व्हावे, अशी तालुक्यातील नागरिकांच्या वतीने मागणी केली होती. त्यावर मंत्री गुलाबराव पाटील यांनी तात्काळ या संदर्भात हालचाली करून लवकरच उपजिल्हा रुग्णालय होणार असल्याची माहिती अॅड. संजय महाजन यांना दिली आहे. उपजिल्हा रुग्णालयाचा प्रस्ताव देण्यात आला असून फक्त पदं मंजूर करण्याचे काम सुरु असल्याचेही कळते.
