नवी दिल्ली (वृत्तसंस्था) भारतीय जनता पार्टीचे वरिष्ठ नेते आणि राज्यसभेचे खासदार सुब्रमण्यम स्वामी यांनी पंतप्रधान नरेंद्र मोदींना आत्मनिर्भर होण्याचा सल्ला दिला आहे. सुब्रमण्यम स्वामी यांनी ट्विटरवरुन केंद्र सरकारला इशारा देताना भारत सरकारने अमेरिकेमध्ये सत्तेत येणाऱ्या जो बायडेन यांच्या सरकारची चेष्टा करु नये, असं म्हटलं आहे. तसेच कमला हॅरिस हिंदू राष्ट्रवादाच्या विरोधात असल्याचेही म्हंटले आहे.
पंतप्रधान नरेंद्र मोदींना अमेरिकेचे नवनिर्वाचित राष्ट्राध्यक्ष बायडेन यांना शुभेच्छा देताना, भव्य विजयाबद्दल तुम्हाला हार्दिक शुभेच्छा. भारत-अमेरिका संबंधांसाठी उपराष्ट्राध्यक्ष म्हणून तुम्ही यापूर्वी दिलेले योगदान खरोखरच कौतुकास्पद होते. आता तुम्ही राष्ट्राध्यक्ष झाल्याने भारत-अमेरिका संबंधांना नव्या उंचीवर नेण्यासाठी पुन्हा एकदा तुमच्याबरोबर काम करता येईल, असं म्हटलं होतं. मोदींनी उपराष्ट्राध्यक्ष झाल्याबद्दल भारतीय वंशाच्या कमला हॅरिस यांचेही अभिनंदन केले. तुमचे यश प्रेरणादायक आहे. हा केवळ तुमच्या नातलगांसाठीच नव्हे, तर सर्व भारतीय-अमेरिकेच्या जनतेसाठी अभिमानाचा क्षण आहे. भारत-अमेरिका संबंध तुमच्या नेतृत्वात आणि सहकार्याने नवीन उंची गाठतील, अशी आशा मला आहे, असं मोदी ट्विटमध्ये म्हणाले होते.
“प्रसारमाध्यमांमधील वृत्तांनुसार अमेरिकेत बायडेन-हॅरिस यांच्या सरकारला भारतामध्ये आमंत्रित केलं जाणार आहे. केंद्र सरकारने दोघांचीही चेष्टा करु नये. भारताशी संबंधित प्रकरणांमध्ये जो बायडेन हे कमला हॅरिस यांच्या माध्यमातून येतील आणि कमला हॅरिस या वैचारिक दृष्ट्या हिंदू राष्ट्रवादाच्या विरोधात म्हणजेच भाजपाच्या विरोधात आहेत. अशावेळी पंतप्रधान मोदींनी आत्मनिर्भर व्हावं,” असं ट्विट सुब्रमण्यम स्वामींनी केलं आहे.
