मुंबई (वृत्तसंस्था) महाराष्ट्रात भाजपला लोकसभेच्या आज निवडणुका झाल्या तर मोठा धक्का बसण्याची शक्यता आहे. राज्यातल्या ४८ पैकी फक्त १८ जागा भाजपला मिळतील,असा अंदाज आहे. इंडिया टुडे आणि सी व्होटरने याबाबतचे सर्वेक्षण केले आहे. या सर्वेक्षणातून ‘देशाचा मूड’ जाणून घेण्याचा प्रयत्न करण्यात आलाय.
भाजपला १८ जागा मिळण्याची शक्यता
इंडिया टुडे आणि सी व्होटरच्या आश्चर्यकारक निष्कर्ष आले. या सर्व्हेत महाराष्ट्रात राजकीय स्थितीचेही मुल्यांकन करण्यात आले आहे. जर महाराष्ट्रात लोकसभेच्या निवडणुका पार पडल्या. तर महाराष्ट्रात युपीएला 48 पैकी 30 जागा मिळतील. तर भाजपप्रणित एनडीला 18 पर्यंत जागा मिळण्याची शक्यता वर्तवण्यात आली आहे. म्हणजे लोकसभा निवडणुकीत महाराष्ट्रात शिवसेना, काँग्रेस आणि राष्ट्रवादी काँग्रेसची महाविकास आघाडी कायम राहिल्यास ही भाजपसाठी धोक्याची घंटा ठरण्याची शक्यता आहे. महाराष्ट्रात भाजपने 2019 मध्ये शिवसेनेसोबत एकत्र लोकसभा निवडणूक लढवली होती. त्यावेळी त्यांना तब्बल 42 जागांवर विजय मिळाला होता. सर्व्हेनुसार, बिहारमध्ये जर निवडणुका झाल्या, तर नितीश कुमार यांनी एनडीए सोडल्याचा भाजपला फटका बसू शकतो. तर यूपीए फायद्यात असू शकते. पंतप्रधान नरेंद्र मोदी यांच्या विरोधात सर्व पक्ष एकवटले असले तरी लोकसभा निवडणुका झाल्यास एनडीला स्पष्ट बहुमत मिळेल असे दिसतंय. मोदींना 330 जागा मिळण्याच्या शक्यता आहे. एनडीएला 2019 मध्ये 353 जागा मिळाल्या होत्या.
सी व्होटरच्या सर्वेक्षणात ईडी, सीबीआयचा गैरवापर होत आहे का, असा प्रश्न विचारण्यात आला होता. यावर 38 टक्के लोकांनी होय आणि 41 टक्के नाही असे उत्तर दिले. तर 39 टक्के लोकांच्या मते देशातील जातीय वातावरण बिघडले आहे. 34 टक्के लोकांनुसार देशातील सलोखा वाढला आहे. 18 टक्के लोक हे न्युट्रल राहिले आहेत. दरम्यान, देशाचा पुढचा पंतप्रधान कोण असेल?, असा प्रश्न सर्वेक्षणात लोकांना विचारण्यात आला. यावेळी, 53 टक्के लोकांनी नरेंद्र मोदींच्या नावावर शिक्कामोर्तब केले. सर्वेक्षणात राहुल गांधी यांचे नाव दुसऱ्या क्रमांकावर होते. 9 टक्के लोकांनी त्यांना मतदान केले. याशिवाय, केजरीवाल यांना 6 टक्के तर योगी यांना 5 टक्के आणि शहा यांना 3 टक्के मते मिळाली आहेत. सर्वेक्षणात सहभागी झालेल्या 40 टक्के लोकांनी विरोधी पक्ष म्हणून काँग्रेसचे काम चांगले असल्याचे मानले, तर 34 टक्के लोकांनी त्यांची कामगिरी खराब असल्याचे म्हटले.
