अमळनेर (प्रतिनिधी) येथील नगरपालिकेच्या हशीमजी प्रेमजी व्यापारी संकुलात एका ३५ वर्षीय तरुणाचा गळा चिरून खून केल्याची धक्कादायक घटना आज पहाटे उघडकीस आली होती. या प्रकरणी पोलिसांनी तपासाची चक्र फिरवून अवघ्या काही तासातच संशयित आरोपीला ताब्यात घेतले आहे.
यासंदर्भात अधिक असे की, अमळनेर शहरात हाशीमजी प्रेमजी शॉपींग कॉम्पलेक्स पहिल्या मजल्यावरील कैलास पांडुरंग शिंगाणे (भोई) याचे भोईराज आईस्क्रीम पार्लर दुकानाबाहेर प्रकाश दत्तात्रय चौधरी (वय ३२ वर्षे रा. गांधलीपुरा, अमळनेर) यांचा धारदार शस्त्राने गळा चिरुन खून केल्याने घटना घडली. हि माहिती मिळाल्याने लागलीच सपोनि राकेशसिंह परदेशी हे पोलीस पथकासह घटनास्थळी रवाना होवून मयताची ओळख पटविता मयताचे वडील यांना सदर खुनाबाबत माहिती देवून त्यांना मयताचे प्रेत दाखविता त्यांनी त्यास ओळखले. त्यावेळी त्यांना विश्वासात घेवून विचारपूस करता त्यांनी सांगितले की, माझा मुलगा प्रकाश चौधरी याने एक वर्षापुर्वी टि.व्ही.ची केबल वायर टाकण्याचे घेण्याकरीता कैलास पांडूरंग शिंगाणे (भोई) रा. अमळनेर यास अॅडव्हान्स स्वरुपात एक लाख रुपये दिले होते. परंतु, कैलास शिंगाणे हा त्यास काम देखील देत नव्हता व पैसे देखील परत करत नव्हता यावरुन त्यांच्यात बऱ्याच वेळा शाब्दीक वाद झालेले होते. असे सांगितल्यावरुन दोन वेगवेगळे पोलीस पथक तयार करुन एक पथक अमळनेर शहरातील सीसीटिव्ही कॅमेरे चेक करणेकामी रवाना केले व दुसरे पथक कैलास शिंगाणे याचा शोध घेणेकामी रवाना करुन मयताचे प्रेत ग्रामीण रुग्णालय अमळनेर येथे शवविच्छेदनासाठी पाठविले. मयताचे वडील दत्तात्रय वंजी चौधरी (वय ५८ वर्ष) यांचे फिर्यादी वरुन अमळनेर पो.स्टे. भाग ५ गुरनं. ३६१/२०२१ भादंवि कलम ३०२ प्रमाणे गुन्हा दाखल करण्यात आला.
सदर पथकाने अमळनेर शहरात सीसीटीव्ही कॅमे-याचे फुटेज चेक असता कैलास शिंगाणे हा मयताचे सोबत दिसून आल्याने सदरचा खून कैलास शिंगाणे याने केल्याचे निष्पन्न झाले. कैलास शिंगाणे याचे शोध कामी पाठविलेले पथक यांनी त्याचा गुप्त बातमीदारामार्फत शोध घेवून तो चोपडा येथे गेल्याचे निष्पन्न झाले. त्यानंतर त्यास ताब्यात घेवून अमळनेर पोलीस स्टेशनला आणून आरोपी कैलास पांडुरंग शिंगाणे (भोई) यांस विश्वासात घेवून विचारपूस करता त्याने गुन्हा केल्याची कबुली दिली आहे.
सदर गुन्हा पोलीस अधिक्षक डॉ. प्रविण मुंढे तसेच उविभागीय पोलिस अधिकारी, अमळनेर भाग राकेश जाधव व पोलीस निरीक्षक जयपाल हिरे यांचे मार्गदर्शनाखाली सदर गुन्ह्याचा तपास सपोनि, राकेशसिंह सुरेशसिंह परदेशी हे करीत असुन सदर गुन्हयाचे तपासात पोउनि, वाघ सफो, साळुंके, हेकॉ, हटकर, किशोर पाटील, तोमर, विसावे, पोना, भामरे, माळी, पोका, रवि पाटील, अमोल पाटील, राहूल चव्हाण, फॉरेन्सीक टिम जळगाव यांनी सहकार्य केले आहे.
