जळगाव (प्रतिनिधी) जिल्हाधिकारी कार्यालयासमोर आपल्या मागण्यांसाठी बसलेल्या आंदोलनकर्त्या महिलांना मनियार बिरादरीतर्फे मिठाई व फराळाचे बॉक्स स्नेहभेट म्हणून देण्यात आले.
२३ दिवसापासून जिल्हाधिकारी कार्यालयासमोर महाराष्ट्रातील महिला बचत गट मायक्रो फायनान्स कर्ज माफीसाठी शहरातील महिला आंदोलन करीत असून आज या आंदोलनाचा २३ दिवस होता. गुरुवारी दिवाळी लक्ष्मी पूजन व शुक्रवारी भाऊबीज असे दिवाळीचे महत्वाचे समारंभ सुरू असताना या महिला त्यात खास करून गायत्री सोनवणे, चारुलता सोनवणे, छाया जाधव व फिरोजा शेख या सकाळी दहा ते संध्याकाळी सहा वाजेपर्यंत आंदोलन करीत आहे.
शासनाचे अधिकारी, लोकप्रतिनिधींनी व पालकमंत्र्यांनी पाहिजे तसे लक्ष न दिल्याने दिवाळी सारखा सणाला महिला रस्त्यावर आपल्या मागण्यासाठी बसलेल्या आहे. त्यामुळे त्यांचे कुटुंब दिवाळी साजरा करू शकत नसल्याने जिल्हा मुस्लिम मनियार बिरादरीचे अध्यक्ष फारुक शेख यांनी त्यांची भेट घेऊन त्यांना मिठाई व फराळाचे बॉक्स स्नेह भेट म्हणून दिले.
शेख यांनी पालकमंत्र्यांच्या स्वीय सहाय्यक बंडू दादा यांचेशी चर्चा करून पालकमंत्री ना. गुलाबराव पाटील यांनी या महिलाच्या आंदोलनाकडे लक्ष देऊन त्यांच्या मागण्यांचा सहानुभूतीपूर्वक विचार करून त्यांना आश्वासन द्यावे, अशी मागणी केली. तसेच आंदोलनकर्त्या महिलांनी आपला दिवाळीचा सण घरात कुटुंब व मुलाबाळांसह साजरा करता यावा, यासाठी शासनाने व लोकप्रतिनिधींनी दखल घ्यावी, अशी मागणी सुद्धा फारुक शेख यांनी केलेली आहे.
