गोंदिया (वृत्तसंस्था) जमिनीचे फेरफार करून देण्यासाठी वृद्धेकडून १८ हजार रुपयांची लाच घेताना तलाठी व कोतवालास लाचलुचपत प्रतिबंधक विभागाच्या पथकाने रंगेहाथ अटक केली. तलाठी मधुकर नकटू टेंभुर्णीकर (वय ५५, रा. गोरेगाव ) तर कोतवाल राकेश संपत वालदे (वय ३८, रा. गिधाडी) असे संशयित आरोपींचे नावं आहेत.
तक्रारदार महिलेच्या पतीला तीन भाऊ व चार विवाहित बहिणी आहेत. त्यांच्या दिराचे लग्न न झाल्याने ते तक्रारदाराकडे राहत होते. दिराने आजारपणामुळे त्यांची गिधाडी येथील भू. क्र. १ खा.क्र. ३५७ मध्ये असलेली एक हेक्टर शेती तक्रारदारांच्या नावाने नोंदणी करून दिली. दिराच्या मृत्यूनंतर तक्रारदाराने मृत्युपत्रानुसार जमिनीचे आपल्या नावावर फेरफार करण्यासाठी मार्च – २०२३मध्ये तलाठी कार्यालयात कागदपत्रे दिली. मात्र तलाठी टेंभुर्णीकर याने कोतवाल वालदे याच्यामार्फत २० हजार रुपयांची मागणी केली.
यावर तक्रारदाराने लाचलुचपत प्रतिबंधक विभागाकडे तक्रार दिली असता विभागाकडून २८ सप्टेंबरला सायंकाळी चार वाजता तलाठी कार्यालयात पडताळणी करण्यात आली. तलाठी टेंभुर्णीकर याने तडजोडीअंती कोतवाल वालदे याच्यामार्फत १८ हजार रुपयांची लाच स्वीकारली असता लाचलुचपत प्रतिबंधक विभागाच्या पथकाने त्यांना रंगेहाथ पकडले. पथकाने दोघांनाही ताब्यात घेतले आहे. याप्रकरणी गोरेगाव पोलीस ठाण्यात गुन्हा नोंद करण्यात आला आहे.
ही कारवाई पोलीस उपअधीक्षक विलास काळे, सापळा अधिकारी पोलीस निरीक्षण उमाकांत उगले, पोलीस निरीक्षण अतुल तवाड़े, साहाय्यक फौजदार विजय खोब्रागडे, चंद्रकांत करपे, हवालदार संजय बोहरे, मंगेश काहालकर, पोलीस नायक संतोष शेंडे, संतोष बोपचे, अशोक कापसे, प्रशांत सोनवाने, कैलास काटकर, महिला शिपाई संगीता पटले, रोहिणी डांगे, चालक शिपाई दीपक बाटबर्वे यांनी केली.
