धरणगाव (प्रतिनिधी) येथील शतकोत्तर पी.आर.हायस्कूलच्या वर्धापन दिनाच्या कार्यक्रमाची रंगीत तालीम सुरु असतांना स्टेजवर बसस्थानकाच्या बाजूने काही टार्गट मुलांनी दगडं फेकून मारल्यामुळे विद्यार्थी भेदरले होते. याची पोलिसांना माहिती दिल्यानंतर बसस्थानक परिसरात बंदोबस्त वाढवण्यात आला असून सीसीटीव्ही फुटेजच्या आधारावर एका मुलाला समज देण्यात आली आहे. दरम्यान, तक्रारीची तात्काळ दखल घेतल्यामुळे पी.आर.हायस्कूलचे मुख्याध्यापकांसह शिक्षकांनी पोलिसांचे आभार मानले आहेत.
शुक्रवारी शाळेच्या वर्धापन दिनाच्या कार्यक्रमाची रंगीत तालीम स्टेजवर सुरू असताना मागचे गेट बंद असल्याचे पाहून तीन विद्यार्थ्यांनी दगडफेक केली होती. त्यामुळे विद्यार्थ्यांची धावाधाव झाली होती. त्यांचे हे कृत्य गेटवर लावलेल्या सीसीटीव्ही कॅमेऱ्यात कैद झाले होते. सीसीटीव्ही कॅमेऱ्याचे फुटेज व्हायरल झाल्यावर अनेक लोकांनी या विद्यार्थ्यांना ओळखले. हे तिघेही तालुक्यातीलच एका गावाचे आहेत. हे तिघं विद्यार्थी इतर शाळेत शिकतात. या विद्यार्थ्यांची पी.आर.हायस्कूल प्रशासनाने पोलीसात तक्रार केली असून पोलीस चौकशी करत आहेत.
दरम्यान, पोलिसांनी तक्रारीची दखल चौकशी सुरु करत बसस्थानक परिसरात बंदोबस्त वाढविला. यामुळे धरणगाव पोलीस स्टेशनचे पोलीस निरीक्षक राहुल खताळ यांचे पी.आर.हायस्कूलचे मुख्याध्यापक डॉ. संजीवकुमार सोनवणे,शिक्षक आणि विद्यार्थांसह पालकांनी आभार मानले आहेत. तर दुसरीकडे बसस्थानक जवळच्या मराठी शाळेच्या गेटवर बसून मुलींची छेड काढणे, विद्यार्थ्यांना धमकावणे, याशिवाय बस मधून अपडाऊन करताना मुलींची छेड काढणे, वृद्धांची हेळसांड करण्याच्या तक्रारी सतत होत असतात. यामुळे पालकांनी लहान वयातच मुलं वाईट मार्गाला जाणार नाहीत, याची काळजी घेण्याची गरज घेण्याची गरज असल्याचा सूर सुज्ञ नागरिकांमधून व्यक्त होत आहे.
शहरातील कुठल्याही शाळेच्या विद्यार्थ्यांना कुणी त्रास देत असेल तर घाबरून जाऊ नये. पालकांनी किंवा शिक्षकांनी पोलिसांसोबत तात्काळ संपर्क साधावा. कुठल्याही प्रकारची दादागिरी, गैरकृत्य खपवून घेतले जाणार नाही. शहरातील सर्व शाळा परिसरात साध्या वेशातील पोलीस गस्त घालतील. तसेच योग्य त्याठिकाणी बंदोबस्त वाढवला आहे. टार्गट मुलांच्या पालकांनीही आपल्या मुलांना योग्य ती समज देणे गरजेचे आहे.
-राहुल खताळ (पोलीस निरीक्षक, धरणगाव)
