लातूर (वृत्तसंस्था) शेतकऱ्याच्या विहिरीवर शेती पंपाला विद्युत कनेक्शन देण्यासाठी तीन हजार रुपयांच्या लाचेची मागणी करून तडजोडीअंती दोन हजार रुपयांची लाच स्वीकारताना महावितरणच्या बेलकुंड (ता. औसा) उपकेंद्रातील एका तंत्रज्ञाला (वर्ग ३) लाचलुचपत प्रतिबंधक विभागाच्या पथकाने शनिवारी (दि.१८) दुपारी रंगेहाथ पकडल्याची घटना औसा शहराजवळील तुळजापूर टी पॉईंटजवळ घडली.
औसा येथील एका शेतकऱ्याला त्यांच्या विहिरीवर विद्युत पंप बसविण्यासाठी महावितरणकडून कनेक्शन हवे होते. यासाठी शेतकऱ्याने आरोपी सतीश उत्तमराव कांबळे (वय ३८, महावितरण तंत्रज्ञ, बेलकुंड शाखा, ता. औसा, रा. हंगरगा, ता. निलंगा, जि. लातूर) याच्याकडे कागदपत्रांची पूर्तता केली. कनेक्शन देण्यासाठी शेतकऱ्याने सतीश कांबळे याला १ डिसेंबर २०२३ रोजी फोन पे द्वारे १३ हजार रुपये लाच म्हणून पाठविले. त्यानंतर ६ डिसेंबर २०२३ रोजीही फोन पे द्वारेच आणखी २ हजार रुपये पाठविले. सुमारे १५ हजार रुपये लाच घेऊनही सतीश कांबळे याने शेतकऱ्याला विद्युत कनेक्शन दिले नाही. यामुळे पुन्हा सदर शेतकऱ्याने विद्युत कनेक्शन देण्याची विनंती सतीश कांबळे याच्याकडे केली. त्यावेळी कांबळे याने सदर शेतकऱ्याला पुन्हा ३ हजार रुपयांच्या लाचेची मागणी केली. ही गोष्ट शेतकऱ्याला खटकली. त्याने लातूरच्या लाचलुचपत प्रतिबंधक विभागाशी संपर्क साधला.
तडजोडीअंती दोन हजार रुपये देण्याचे शेतकऱ्याने मान्य केले. ते दोन हजार रुपये स्वीकारण्यास सतीश कांबळे हा औसा शहराजवळील तुळजापूर टी-पॉईंटजवळ आला. त्याने शेतकऱ्याकडून एका हॉटेलमध्ये दोन हजार रुपयांची लाच शनिवारी (दि.१८) दुपारी पावणे तीन वाजेच्या सुमारास स्वीकारली. लाच स्वीकारताच सापळा लावून बसलेल्या लाचलुचपत प्रतिबंधक विभागाच्या पथकाने आरोपी सतीश कांबळे याला लाचेच्या रकमेसह रंगेहाथ पकडले. याप्रकरणी आरोपी सतीश कांबळे याच्या विरोधात औसा पोलीस ठाण्यात कलम ७,७ अ भ्रष्टाचार प्रतिबंध अधिनियम १९८८ नुसार गुन्हा दाखल करण्यात आला आहे. अधिक तपास औसा पोलीस करीत आहेत. लाचलुचपत प्रतिबंधक विभागाचे उपअधीक्षक संतोष बर्गे यांच्या नेतृत्वात पोलीस निरीक्षक भास्कर पुल्ली, अन्वर मुजावर पोलीस हेड कॉन्स्टेबल फारूक दामटे, भीमराव आलुरे, श्याम गिरी, शिवशंकर कच्छवे, कॉन्स्टेबल संदीप जाधव, मंगेश कोंडरे, दीपक कलवले, गजानन जाधव, संतोष क्षीरसागर यांनी ही कामगिरी बजावली.
