मंगळवेढा (वृत्तसंस्था) वाळू वाहतूक करणाऱ्या एका टेम्पोने मंगळवेढा पोलीस ठाण्याच्या एका पोलीस कर्मचाऱ्याला चिरडलं. या घटनेत पोलीस कर्मचारी जागीच गतप्राण झाला. दरम्यान, या घटनेमुळे प्रचंड खळबळ उडाली आहे.
सोलापूर जिल्ह्यातील गोणेवाडी- शिरशी (ता. मंगळवेढा) मार्गावर ही घटना घडली. या घटनेत पोलीस कॉन्स्टेबल गणेश प्रभू सोलनकर (वय ३२) यांचा जागीच मृत्यू झाला आहे. लोकअदालत असल्याने सोलनकर हे समन्स बजावण्यासाठी गेले होते. यावेळी समोरून येणाऱ्या वाळूच्या टेम्पोला त्यांनी हात केला असता टेम्पोचालकाने गाडी थेट त्यांच्या अंगावर घालून चिरडले. यात गंभीर जखमी होऊन ते जागीच गतप्राण झाले. याप्रकरणी पोलिसांनी चालक रणजीत महादेव सुडके, सागर तानाजी मासाळ व एका अल्पवयीन मुलाला ताब्यात घेतले आहे.
