सोलापूर (वृत्तसंस्था) अक्कलकोट येथे देवदर्शनासाठी आलेल्या भाविकांच्या वाहनाचा दुपारी चारच्या दरम्यान भीषण अपघात झाला. अक्कलकोट तालुक्यातील शिरवळवाडी येथील वळणावर क्रूझर आणि सिमेंटची वाहतूक करणाऱ्या ट्रकचा अपघात झाला. या अपघातात ६ जणांचा जागीच मृत्यू झाला. गाणगापूर आणि अक्कलकोट येथे दर्शन करून घरी परतत असताना ही दुर्घटना घडली. या जीपमध्ये एकूण १६ प्रवासी प्रवास करत होते.
मृतांमध्ये पाच महिलांसह एका मुलाचा समावेश !
अपघातातील सर्व भाविक कर्नाटक राज्यातील कलबुर्गी (गुलबर्गा) जिल्ह्यातील आळंद तालुक्यातील अणूर येथील आहेत. मृतांमध्ये पाच महिलांसह एका मुलाचा समावेश आहे. अपघातात संगीता मदन माने (वय ३५, रा. बेडगा, ता. उमरगा), ललिता महादेव बुग्गे (वय ५०, रा. अणूर, ता. आळंद), छाया हनुमान ननवरे ( वय ४६, रा. इंदापूर, जि. पुणे), रोहिणी गोपाळ पुजारी (वय ४०, रा. अणूर, ता. आळंद), साईनाथ गोविंद पुजारी (वय २०, रा. अणूर, ता. आळंद) व सुंदराबाई भारतसिंग रजपूत (वय ५६, रा. अणूर, ता. आळंद) यांचा मृतांमध्ये समावेश आहे.
जखमींवर सोलापूरच्या शासकीय रुग्णालयात उपचार !
या अपघातात सात जण गंभीर जखमी झाले आहेत. जखमींवर अक्कलकोट येथील ग्रामीण रुग्णालयात प्राथमिक उपचार करून पुढील उपचारासाठी सोलापूरच्या शासकीय रुग्णालयात दाखल करण्यात आले आहे. त्यामध्ये कल्पना अशोक कुंदले ( वय ४०), भावेश आकाश कुंदले (वय १९), रेखा गोविंदा पुजारी (वय ३५), सुमित गोपाल पुजारी ( वय १०), अशोक सिद्राम कुंदले (वय ५५), कोमल माणिक शामदे (वय ४५), सुनील हनुमंत पांचाळ (वय ४५), विठ्ठल हनुमंत ननवरे (वय ४५), अजित अशोक कुंदले (वय २५), महानंदा लक्ष्मण कुंदले (वय ३२, रा. सर्व अणूर, ता आळंद, जि. गुलबर्गा) यांचा समावेश आहे. यातील सुमित गोपाल पुजारी या दहा वर्षीय मुलासह दोघांची प्रकृती गंभीर आहे.
रस्त्यावर अक्षरशः रक्ताचा सडा !
हे सर्व भाविक देवदर्शन करून क्रूझर (क्र केए ३५ ए ७४९५) जीपमधून गुलबर्गाकडे निघाले होते. त्यावेळी गुलबर्गा येथून निघालेला सिमेंटचा ट्रक (क्र. एम एच १२ यूएल ७१८६) आणि या जीपची समोरासमोर धडक झाली. हा अपघात एवढा भीषण होता की, यातील सहा जण जागीच ठार झाले. रस्त्यावर अक्षरशः रक्ताचा सडा पडला होता. परिसरातील नागरिकांनी घटनास्थळावर धाव घेत जखमी आणि मृतांना बाहेर काढण्यास मदत केली.
रस्ता अरुंद व वळणाचा असल्याने अनेकदा चालकांचा सुटतो ताबा !
आळंद- अक्कलकोट मार्गावर सिमेंट बल्करची भरधाव वेगात वाहतूक होते. काही रस्ता अरुंद व वळणाचा असल्याने अनेकदा चालकांचा ताबा सुटतो. शुक्रवारच्या अपघातातील जीपही मुख्य रस्त्यावरून शेतात जाऊन उलटली होती. अक्कलकोट शहरातील अनेक खासगी वाहनांतून जखमींना अक्कलकोट रुग्णालयातून सोलापूर शासकीय रुग्णालयात दाखल केले. होते. अपघातस्थळी भयावह चित्र होते.
