नागपूर (वृत्तसंस्था) कारमध्ये बसून आलेल्या सात ते आठ अज्ञात हल्लेखोरांनी दोन मित्रांवर धारदार शस्त्राने हल्ला केला. यात एकाचा जागीच मृत्यू झाला, तर दुसरा गंभीर जखमी झाला. घटनेनंतर हल्लेखोर पसार झाले. ही घटना एमआयडीसी पोलीस स्टेशन अंतर्गत राजीवनगर बसस्टॉपजवळ बुधवार, १६ ऑगस्टला रात्री ९.३० वाजताच्या सुमारास घडली. राकेश मिश्रा (वय २७) असे मृतकाचे, तर रवी जयस्वाल (वय २८), असे गंभीर जखमीचे नाव आहे.
दोघेही राजीवनगर, हिंगणा रोड नागपूर येथील रहिवासी आहेत. ते दोघेही या भागात आरटीओशी संबंधित कागदपत्रे तयार करण्याचे काम करीत होते, अशी माहिती आहे. दररोज सायंकाळी ते बसस्टॉपवर येऊन बाजूला एका टपरीवर बसायचे. आजही ते तिथे बसून असताना काही अंतरावर कारमधून सात ते आठ जण उतरले. त्यांनी चेहऱ्याला दुपट्टे बांधले होते.
राकेश व रवीच्या जवळ येऊन त्यांनी धारदार शस्त्राने सपासप वार केले. या हल्ल्यात राकेशचा जागीच मृत्यू झाला. तर रवी हा जीव वाचविण्यासाठी बाजूला असलेल्या एका महिला डॉक्टरच्या क्लिनिकमध्ये घुसला व काचेचे केबिन आतून बंद करून घेतले.
आरोपी त्याचा पाठलाग करीत तिथे पोहोचले. त्यांनी काचेची केबिन फोडून रुग्ण व डॉक्टरसमोरच त्यालाही गंभीर जखमी केले व कारमध्ये बसून फरार झाले. एमआयडीसी पोलिसांना माहिती मिळताच पोलीस घटनास्थळी दाखल झाले. जखमीला लता मंगेशकर रुग्णालयात उपचारासाठी पाठविण्यात आले. हा हल्ला नेमका कशासाठी झाला हे कळू शकले नाही. याबाबतचे वृत्त आज एका दैनिकाने दिले आहे.
