जळगाव (प्रतिनिधी) एजंटने मध्यस्ती करून १ लाख ६० हजार रुपये देवून मुलाचे लग्न केले. परंतु लग्नाच्या तिसऱ्या दिवशी रात्रीच्या सुमारास घरातील सर्व जण झोपलेले असतांना वधू दागिने घेवून पसार झाली. ही घटना दि. १४ ते दि २३ फेब्रुवारी दरम्यान घडली. याप्रकरणी वराकडील मंडळींची दोन लाख ४४ हजार रुपयांमध्ये फसवणूक केल्याप्रकरणी एमआयडीसी पोलिस ठाण्यात वधूसह एजंट व इतर दोघे असे एकूण चार जणांविरुद्ध गुन्हा दाखल करण्यात आला आहे.
शहरातील रामेश्वर कॉलनी परिसरातील २७ वर्षीय रिक्षाचालक तरुण आई, वडील, आजीसह वास्तव्यास आहे. अनेक दिवसांपासून लग्नासाठी शोध घेऊनही मुलगी मिळत नसल्याने या तरुणाच्या आईने बऱ्हाणपूर येथील आशाबाई (पूर्ण नाव समजू शकले नाही) नामक कमिशन एजंट महिलेशी संपर्क साधला. तिने पूजा गंगाराम गावडे (रा. पिपरी महेपाल, समरडक, ता. जि. यवतमाळ) ही लग्नाची मुलगी असून तिचा फोटो पाठविला. लग्नाची बोलणी पक्की झाली व एजंट महिलेला एक लाख ६० हजार रुपये देण्याचा व्यवहार ठरला. त्यानंतर १८ फेब्रुवारी रोजी रात्री एजंट आशाबाई, वधू पूजा गावडे, तिची आई निर्मलाबाई डोंगरे, मावसा शिवशंकर, मामा गोपाळ खंडारे मुलीला दाखविण्यासाठी तरुणाच्या घरी आले. मात्र आपल्याला वेळ नसल्याने लगेच लग्न लावून देण्याचे सांगत दि. १९ रोजी पूजाचे जळगावातील रामेश्वर कॉलनीतील तरुणाशी लग्न लावून दिले. त्यानंतर एक लाख ६० हजार रुपये घेऊन वधू वगळता इतर जण मंदिरातूनच निघून गेले होते.
घरातील सर्व जण झोपलेले असतांना वधू पसार
२२ फेब्रुवारी रोजी रात्री जेवण झाल्यानंतर सर्व जण झोपलेले होते. सकाळी तरुणाला जाग आली त्या वेळी पूजा खोलीत नव्हती. त्याने घरातील सदस्यांना विचारले असता त्यांनीही तिला पाहिले नसल्याचे सांगितले. नववधू पूजाचा शोध घेऊनही ती न सापडल्याने एजंट व इतरांकडे विचारणा केली असता त्यांनी तरुणाला उडवाउडवीचे उत्तरे दिली.
लग्नात दिलेले दागिनेही नेले चोरुन
मुलाचे लग्न करायचे असल्याने तरुणाच्या आईने मणी-मंगळसूत्र, कर्णफुले, सोनपोत असे दागिने करून ठेवले होते. लग्नामध्ये वधूला हे घातले होते. मात्र ८४ हजार रुपयांचे दागिने घेऊन ही वधू पसार झाली. पत्न परत येत नसल्याने व पैसे, दागिनेही गेल्याने फसवणूक झाल्याचे लक्षात आल्याने तरुणाने एमआयडीसी पोलिस ठाण्यात फिर्याद दिली. त्यावरून एजंट आशाबाई, पूजा गावडे, निर्मलाबाई डोंगरे, शिवशंकर यांच्याविरुद्ध गुन्हा दाखल करण्यात आला आहे. पुढील तपास पोउनि अशोक काळे करीत आहेत.
