पातोंडा ता. अमळनेर (प्रतिनिधी) रक्षाबंधन निमित्ताने बहिणीला घेण्यासाठी निघालेल्या भावाचा वाटेतच दोन बसेसच्या एकमेकांना ओव्हरटेक करण्याच्या नादात मोटरसायकलस्वाराला धडक देऊन गंभीर अपघात झाल्याची घटना रविवार रोजी सकाळी साडे नऊ ते दहाच्या दरम्यान सावखेडा फाट्यावर असलेल्या देव हॉटेलच्या जवळ घडली.
रत्नपिंप्री येथील रहिवासी रोहित मराठे हा रक्षाबंधन निमित्ताने आपल्या बहिणीला घेण्यासाठी तिच्या सासरी नारणे येथे जात होता. नारणे फक्त दहा किलोमीटर असताना सावखेडा फाट्याजवळ असलेल्या देव हॉटेलच्या आसपास सकाळी अंदाजे साडे नऊ ते दहाच्या दरम्यान, अमळनेरकडून चोपडाकडे जाणाऱ्या अनुक्रमे निळ्या व लाल रंगाच्या दोन बसेस एकामागून एक भरधाव जात होत्या. मागची गाडी पुढच्या बसला ओव्हरटेक करीत असताना बसचा मागील भागाने रोहितला जोरदार धडक दिली. त्यात रोहितची मोटरसायकल पडून त्याचा गंभीर अपघात झाला. त्यात तो पूर्णतः घाबरून गेला.
यामुळे रोहितला बसेसचा नंबर मात्र त्याला घेता आला नाही. सदर घटनेची माहिती मिळताच त्याचे पाहुणे व बहिणीची सासू घटनास्थळी जाऊन पातोंडा येथील खाजगी दवाखान्यात आले. तेथून रुग्णवाहिका करून रुग्णाला प्राथमिक आरोग्य केंद्रात आणले. परंतु प्रा. आ. केंद्र बंद असल्यामुळे कैलास बिरारी यांनी १०८ रुग्णवाहिकेला फोन करून रुग्णवाहिका मागवून पुढील उपचारासाठी अमळनेर पाठविण्यात आले. तेथे त्याच्या पायाची शस्त्रक्रिया केली जाणार असल्याचे नातेवाईकांनी सांगितले.
