भुसावळ (प्रतिनिधी) नाना पाटील यांनी जिल्हा उपनिबंधकांना सादर केलेला दाखला खोटा व बनावट आहे. त्यावर खोट्या सह्या करून संस्थेची फसवणूक केली आहे. याची चौकशी करून योग्य ती कारवाई करावी, अशी तक्रार जय मातादी अर्बन को-ऑप क्रेडिट सोसायटीचे संचालक रईस खान तुराब खान लोधी यांनी नाना पाटील यांच्याविरोधात भुसावळ बाजार पेठ पोलिस ठाण्यात दाखल केली आहे.
जय मातादी अर्बन को-ऑप क्रेडिट सोसायटीचे संचालक रईस खान तुराब खान लोधी यांनी दिलेल्या तक्रारीत म्हटले आहे की, नाना पांडुरंग पाटील हे आमचे संस्थेचे कर्जदार असुन त्यांचाकडे आमच्या संस्थेचे कर्ज थकीत आहे. त्याबाबत एकनाथराव गणपतराव खडसे (रा. मुक्ताईनगर) यांच्या मागणी वरून तसा थकबाकीचा दाखला त्यांना दिलेला आहे. असे असतांना नाना पांडुरंग पाटील (रा. चिंचखेडे बु. पो. निमखेडे बु ता. मुक्ताईनगर जि. जळगाव) यांनी त्यांचाकडे संस्थेचे कोणतीही थकबाकी नाही व ते संस्थेचे सभासद नाही असा खोटा दाखला आमचे संस्थेचे बोगस लेटर पॅड तयार करुन व खोटा शिक्का मारुन तसेच माझी व व्यवस्थापकाची खोटी सही करुन जिल्हा उपनिबंधक जळगाव यांचाकडे सादर केला तो दाखला खोट व बनावट आहे. म्हणुन नाना पांडुरंग पाटील यांनी बोगस दाखला तयार करून त्यावर आमच्या खोट्या सह्या करून संस्थेची व आमची फसवणूक केली आहे. तरी सदर बाबीची चौकशी होवून त्यांच्यावर योग्य ती कारवाई करण्यात यावी, असे यात म्हंटले आहे.
