नाशिक ( प्रतिनिधी ) – गुरु-शिष्याच्या पवित्र नात्याला काळिमा फासणारी एक अत्यंत संतापजनक घटना शहरातील पखाल रोड परिसरात उघडकीस आली आहे. एका खासगी क्लासमध्ये शिकणाऱ्या अल्पवयीन विद्यार्थिनीवर वारंवार अत्याचार केल्याप्रकरणी क्लासचालक महिला आणि तिच्या वासनांध भाच्याविरुद्ध मुंबईनाका पोलीस ठाण्यात गुन्हा नोंदवण्यात आला आहे.
पीडितेने दिलेल्या फिर्यादीनुसार, जुलै २०२४ ते नोव्हेंबर २०२५ या दरम्यान हा प्रकार घडला. पीडिता संशयित राशेदा शेख हिच्याकडे खासगी क्लाससाठी जात असे. यावेळी राशेदाचा संशयित भाचा सिबतेन शेख (रा. वडाळागाव) हा देखील तिथेच असायचा. राशेदा ही वेगवेगळ्या बहाण्याने पीडितेला सिबतेन असलेल्या खोलीत पाठवत असे. या कृत्यात तिचा सक्रिय सहभाग असल्याचे पीडितेने तक्रारीत म्हटले आहे. संधी साधून सिबतेनने पीडितेवर वारंवार बळजबरीने अत्याचार केले. याबाबत कोणालाही काही सांगू नये, यासाठी मावशी आणि भाच्याने पीडितेवर दबाव टाकत तिला जीवे मारण्याची धमकी दिल्याचे फिर्यादीत म्हटले आहे.
जाचाला कंटाळून पोलिसांकडे धाव
सततच्या शारीरिक आणि मानसिक त्रासाला कंटाळून अखेर पीडितेने धीर एकवटून तक्रार दिली. यावरून मुंबईनाका पोलिसांनी सिबतेन शेख आणि राशेदा शेख यांच्यावर पोक्सो आणि बलात्काराचे कलम लावून गुन्हा दाखल केला आहे. पोलीस या प्रकरणाचा अधिक तपास करत आहे
