नवी दिल्ली (वृत्तसंस्था) विवाहित महिलेवर तिच्याच पती आणि मुलांसमोर सामूहिक बलात्कार केल्याची धक्कादायक घटना घडली आहे. राजस्थानमधील ढोलपूर जिल्ह्यात ही घटना घडली आहे. पीडित महिलेने पोलीस ठाण्यात तक्रार दिली आहे. यामध्ये महिलेने सहा जणांविरोधात बलात्काराचा आरोप केला आहे.
मिळालेल्या माहितीनुसार, महिला आपला पती आणि दोन मुलांसोबत शेतातून परतत असताना ही घटना घडली. सहा जणांनी त्यांना अडवलं आणि बंदुकीचा धाक दाखवत धमकावलं. आरोपींनी महिलेच्या पतीला मारहाण केली आणि यानंतर सहापैकी दोघांनी मुलांसमोर महिलेवर बलात्कार केला. यानंतर त्यांनी घटनास्थळावरुन पळ काढला. महिलेची मुलं आपल्या आईची नराधमांच्या तावडीतून सुटका व्हावी म्हणून रडत होती. ओरडत होती. पण त्याचा काहीच फायदा झाला आहे..
महिलेने पोलिसांकडे दिलेल्या जबाबानुसार, आपल्या पतीलाही आरोपींकडून मारहाण करण्यात आली. पोलिसांनी बलात्कार, शारीरीक छळ तसेच विविध कलमांतर्गत गुन्हा दाखल केल्याची माहिती पोलीस उपअधीक्षक विजय कुमार सिंह यांनी दिली आहे. राष्ट्रीय महिला आयोगाने या घटनेची दखल घेतली आहे. पोलीस याप्रकरणाचा अधिक तपास करत असून फरार आरोपींचा शोध घेत आहेत.
