नाशिक (वृत्तसंस्था) आई-वडिलांनी निश्चित केलेल्या मुलाशी लग्न मोडल्याच्या रागातून प्रेयसीने कुटुंबीयांच्या मदतीने प्रियकराला पेट्रोल ओतून जाळून मारण्याचा प्रयत्न केला होता. यात गंभीर भाजलेला प्रियकर गोरख बच्छाव (Gorakh Bachhav) याचा उपचारादरम्यान जिल्हा शासकीय रुग्णालयात मध्यरात्री मृत्यू झाला. व्हॅलेंटाईन दिनीच या युवकाने अखेरचा श्वास घेतल्याने प्रेमादिनाला गालबोट लागले आहे.
शुक्रवारी रावळगाव येथील युवतीने तिच्या कुटुंबीयांसह लोहोणेर येथे येऊन आपला प्रियकर गोरख बच्छाव याच्याशी वाद घालत, त्याच्यावर पेट्रोल टाकून जाळण्याचा प्रयत्न केला होता. या प्रकरणी पोलिसांनी कल्याणी गोकुळ सोनवणे हिच्यासह गोकुळ तोंगल सोनवणे, निर्मला गोकुळ सोनवणे, तसेच तिचे दोन्ही भाऊ हेमंत गोकुळ सोनवणे व प्रसाद गोकुळ सोनवणे (सर्व रा.बी. सेक्शन, रावळगाव) यांना ताब्यात घेतले होते. या घटनेने संपूर्ण जिल्हा हादरून गेला होता. गोरख बच्छाव (वय ३१) हा काही वर्षापूर्वी रावळगाव ता. मालेगाव येथील सदर युवतीच्या संपर्कात आल्याने दोघांमध्ये प्रेम संबंध निर्माण झाले होते. मात्र, युवतीच्या घरच्यांनी तिचे दुसरीकडे लग्न निश्चित केले होते. सदर विवाह मोडल्याने तो गोरख यानेच मोडल्याचा संशय मुलीच्या घरच्यांना आला.
मुलीचे लग्न मोडल्याने मुलीसह तिचे कुटुंबीय लोहोणेर येथे आले. यावेळी गोरख याच्या डोक्यात लोखंडी सळईने वार करून, मुलीने त्याच्या अंगावर पेट्रोल टाकून पेटवून दिले, यात तो गंभीर जखमी झाला होता. घटना घडल्यानंतर संबंधित युवती व तिचे कुटुंबीय स्वतः पोलिसांत हजर झाले होते. त्यानंतर, देवळा पोलिसांनी विविध कलमांतर्गत गुन्हा दाखल केला होता. शनिवारी (दि. १२) त्यांना न्यायालयात हजर केले असता, न्यायालयाने १५ फेब्रुवारीपर्यंत पोलीस कोठडी सुनावली आहे. दरम्यान, आज पहाटे गोरखचा मृत्यू झाल्याने जिल्ह्यात खळबळ उडाली आहे.
व्हॅलेंटाईनदिनी झाले निधन
लाहेणेर गावातील या घटनेने संपूर्ण जिल्हा हादरला होता. शनिवारी लोहोणेर गावातही सन्नाटा पसरलेला होता. गोरख बच्छाव हा ८५ टक्के भाजला, त्याच्यावर नाशिकला जिल्हा रुग्णालयात उपचार सुरू होते. त्याची प्रकृती स्थिर असल्याचे सांगण्यात आले, पण, मध्यरात्री युवकाचा मृत्यू झाला, याबाबत पहाटे माहिती देण्यात आली. व्हॅलेंटाईन दिनीच प्रेमप्रकरणातून घडलेल्या या दुर्देवी घटनेतून युवकाने अखेरचा श्वास घेतला. त्यामुळे, प्रेमदिनाला गालबोट लागले.
