मुंबई (वृत्तसंस्था) कोरोना संसर्गाच्या पार्श्वभूमीवर सर्वसामान्यांसाठी बंद असलेली लोकल पुन्हा सुरु होण्यासाठी अद्याप मुहूर्त मिळालेला नाही. मात्र मुंबई लोकल सर्वसामान्यांसाठी पुन्हा सुरु व्हावी, ही मुख्यमंत्री उद्धव ठाकरे यांची इच्छा आहे. येत्या दहा दिवसात याबाबत निर्णय होईल, अशी घोषणा मदत आणि पुनर्वसन मंत्री विजय वडेट्टीवार यांनी केली.
मुंबईतील लोकल ट्रेनबाबत लवकर निर्णय होणार आहे. मुख्यमंत्री उद्धव ठाकरे थांबलेली मुंबई सुरु करण्यासाठी प्रयत्न करत आहेत. जानेवारीच्या पहिल्या आठवड्यात लोकल सर्वसामान्यांसाठी सुरु व्हावी, असा मुख्यमंत्र्यांचा प्रयत्न आहे, असं विजय वडेट्टीवार म्हणाले. जानेवारीच्या पहिल्या आठवड्यात सामान्यांसाठी लोकल ट्रेन सेवा सुरु करण्याबाबत मुख्यमंत्री उद्धव ठाकरे सकारात्मक आहेत. अशी माहिती मदत व पुनर्वसन मंत्री विजय वडेट्टीवार यांनी दिली आहे. मार्च महिन्यापासून मुंबईची जीवनवाहिनी असलेली लोकल सेवा सामान्यांसाठी बंद आहे. लोकल ट्रेन अनलॉकमध्ये सुरु करण्यात आल्या. मात्र त्या फक्त अत्यावश्यक सेवांमधील कर्मचाऱ्यांसाठीच. त्यानंतर नवरात्रात महिलांना लोकल प्रवासासाठी मुभा देण्यात आली. लोकल सरसकट सगळ्यांसाठी कधी होणार हा प्रश्न उपस्थित होत होता. त्याबाबत आता विजय वडेट्टीवार यांनी माहिती दिली आहे. “डिसेंबरच्या शेवटच्या १५ दिवसांमध्ये कोरोनाची लागण झालेले रुग्ण, रुग्णसंख्या, बरे होणारे रुग्ण आणि कोरोनाच्या दुसरी लाट याचा विचार करु. नवीन वर्षात लोकलला पुन्हा रुळावर आणू आणि सर्वसामान्यांसाठी ही सेवा सुरु करु, असा विश्वास विजय वडेट्टीवार यांनी गेल्या आठवड्यात व्यक्त केला होता.
