जळगाव (प्रतिनिधी) राज्यातील सूक्ष्म, लघू, मध्यम उद्योगांच्या वाढीसाठी धोरणात्मक निर्णय ठरविण्याकरिता व या विषयी सूचना देण्यासाठी असलेल्या रिझर्व्ह बँक ऑफ इंडियाच्या सूक्ष्म, लघू, मध्यम उद्योगांच्या उच्चाधिकार समितीच्या महाराष्ट्र-गोवा राज्य सदस्यपदी उद्योजक संजय दादलिका यांची निवड करण्यात आली आहे.
सूक्ष्म, लघू, मध्यम उद्योगांना येणाऱ्या अडीअडचणी दूर करण्यासाठी व बँकांकडे या उद्योगांकरिता आवश्यक पाठपुरावा करण्याकरिता कार्य करणाऱ्या रिझर्व्ह बँक ऑफ इंडिया सूक्ष्म, लघू, मध्यम उद्योग उच्चाधिकार समितीवर जळगावला स्थान मिळाले आहे. यात संजय दादलिका यांची निवड केल्याचे आरबीआयने पत्रान्वये कळविले आहे. राज्यातील उद्योगांना जास्तीत जास्त लाभ मिळवून देण्यासाठी प्रयत्न करणार असल्याचे दादलिका यांनी सांगितले. दरम्यान, संजय दादलिका हे महाराष्ट्र चेंबर्स ऑफ कॉमर्सचे नाशिक विभागीय अध्यक्ष आहेत. दादलिका यांची आरबीआय एमएसएमई समितीवर निवड झाल्यानिमित्त त्यांचे विविध क्षेत्रातून अभिनंदन होत आहे.
