जळगाव (प्रतिनिधी) शेंदुर्णी (ता.जामनेर येथील) दारुड्या मुलाने अठ्ठ्यात्तर वर्षीय पित्याला मारहाण करत त्यांचा डावा हात मोडल्याची घटना काल मध्यरात्रीच्या सुमारास घडली. वृद्ध पित्याला जिल्हा रुग्णालयात उपचारार्थ दाखल करण्यात आले आहे.
यासंदर्भात अधिक असे की, जखमी पिता बाबुराव महादु पाटील (वय ७८) यांनी दिलेल्या माहिती नुसार, मुलगा गणेश बाबुराव पाटील रात्री साडेअकरा वाजता दारु पिऊन घरी आला. पित्याने काही एक न बोलताही त्याने भांडण उकरुन काढत वृद्ध पित्याला बेदम मारहाण केली. सुनबाई मालनबाई हिने जखमी वृद्धास आज सकाळी जिल्हा रुग्णालयात दाखल केले असून त्यांच्यावर उपचार सुरु आहेत.
