अमरावती (वृत्तसंस्था) शिवसेनेच्या शहरप्रमुखाची निघृणपणे हत्या झाली होती. हत्या झालेल्या शिवसेना शहरप्रमुखाचे नांव अमोल पाटील असं होतं. अमोल पाटील हे तिवसाचे शहरप्रमुखाच होते. त्यांची काल रात्री साडेदहा वाजेच्या सुमारास हत्या झाली होती. सदर घटनेने जिल्ह्यात खळबळ उडाली होती. मात्र, पोलिसांनी घटनेच्या अवघ्या काही तासात चार जणांना अटक केली आहे.
पोलिसांनी दिलेल्या माहितीनुसार, अमोल जनार्दन पाटील (वय ३८) असे मृतकाचे पूर्ण नाव आहे. तो शिवसेना शहर प्रमुख होता. रात्री अमोल पाटील हा आपल्या एका मित्रांसोबत दारू पिण्यासाठी आशीर्वाद बारमध्ये आला होता. पण आरोपींनी अमोल पाटील याच्या हत्येचा आधीच कट रचला होता. आरोपींनी अमोलच्या डोळ्यात मिरचीपूड टाकून त्याच्या डोक्यात धारदार शस्त्राने सपासप वार करत त्याला जागीच ठार केले. पोलिसांना या घटनेची माहिती मिळताच ते तातडीने घटनास्थळी दाखल झाले. त्यांनी घटनास्थळाचा पंचनामा केला. तसेच मृतदेह शवविच्छेदनासाठी रुग्णालयात पाठवण्यात आला. पोलिसांनी आरोपींचा शोध सुरु केला. पोलिसांनी घटनास्थळावर मिळालेल्या काही माहिती आणि पुराव्यांच्या आधारावर तपासाची चक्र फिरवले.
त्यानंतर अवघ्या काही तासातच चार आरोपींना वर्धा जिल्ह्यातील तळेगाव श्यामजीपंत येथून अटक करण्यात आली. अजूनही एक आरोपी पसार असल्याची माहिती पोलीस निरीक्षक रिता उईके यांनी दिली आहे.
