जळगाव (प्रतिनिधी) शहरातील शिवकॉलनी परिसरात दरोडा टाकण्याच्या तयारीत असलेल्या पाच जणांच्या टोळीला रविवारी दुपारी रामानंदनगर पोलिसांनी शिताफीने अटक केली आहे. या टोळीकडून एक पिस्तोल, गुप्ती, चाकू, दोन हातोडया, ब्लेड, मिर्ची पावडर, दोरी आणि दोन हिट स्प्रे जप्त करण्यात आला आहे. खुशाल पांडे, विकी आलोने, नागेश सोनार, वसीम पटेल, पपई उर्फ दुर्गेश संन्याशी ( सर्व रा.जळगाव) असे अटक केलेल्या संशयित आरोपींचे नावे आहेत.
रविवारी दुपारी शिवकॉलनी परिसरातील प्रतिक अपार्टमेंटच्याजवळ ५ व्यक्ती संशयितरित्या फिरत असल्याची गुप्त माहिती रामानंदनगर पोलिस निरीक्षक शिल्पा पाटील यांना मिळाली होती. त्यांनी लागलीच पोलिसांचे स्वतंत्र पथक तयार केले. पथकानेही तात्काळ शिवकॉलनी गाठून पाचही जणांना पकडले. त्यांची अंगझडती घेतली असता त्यांच्याजवळ एक पिस्तोल, गुप्ती, चाकू, दोन हातोडया, ब्लेड, मिर्ची पावडर, दोरी आणि दोन हिट स्प्रे, पेंन्चीस आदी साहित्य मिळून आल्यावर पाचही जण दरोडयाच्या तयारीत असल्याचे स्पष्ट झाले.
याप्रकरणी रामानंदनगर पोलिसात विविध कलमान्वये गुन्हा दाखल करण्यात आला असून पुढील तपास पोलिस उपनिरीक्षक गोपाल देशमुख करीत आहेत. पोलिस अधीक्षक एम.राजकुमार, उपअधीक्षक संदीप गावित, पोलिस निरीक्षक शिल्पा पाटील यांच्या मार्गदर्शनाखाली पोलिस उपनिरीक्षक गोपाल देशमुख, संजय सपकाळे, सुशिल चौधरी, रेवानंद साळूंखे, रविंद्र चौधरी, राजेश चव्हाण, विजय खैरे, अतुल चौधरी, उमेश पवार, अनिल सोननी, दीपक वंजारी आदींनी ही कारवाई केली.
