बुलढाणा (वृत्तसंस्था) अनैतिक संबंधात अडथळा ठरणाऱ्या पतीचा पत्नी आणि तिच्या प्रियकराने मिळून दोरीने गळा आवळून पलंगावरच ठार केल्याची घटना तालुक्यातील मौजे गोरेगाव येथे घडली. या घटनेने परिसरात खळबळ उडाली आहे. दरम्यान या प्रकरणी पोलिसांनी आरोपी पत्नी आणि प्रियकराला अटक केले आहे.
साखरखेर्डा पोलीस स्टेशन अंतर्गत असलेल्या गोरेगाव येथील मीरा दत्तात्रय कव्हळे (वय 36) तिचे गावातील एजाज खान याच्यासोबत अनैतिक संबंध होते. या संबंधाची कुणकुण तिचा पती दत्तात्रय याला लागली होती. याच दरम्यान गावात गवगवा झाल्याने एजाजने माफी मागितली होती. दत्तात्रय यांच्या मुलीचा दहावीचा पेपर असल्याने ते तिला पेपरला सोडण्यासाठी साखरखेर्डा येथे घेऊन गेले होते. तेथून पुन्हा घरी आल्यावर दत्तात्रय आणि मिराचे शाब्दिक भांडण झाले. त्यावेळी तेथे असलेल्या मीराच्या प्रियकर एजाज या दोघांनी मिळून दत्तात्रय यांची हत्या केली.
हातपाय बांधून दोरीने गळा आवळून केला खून
दरम्यान, घरातील पलंगावर दत्तात्रय यांचे हातपाय बांधले आणि दोरीने गळा आवळून खून केला. काहीवेळाने दत्तात्रय यांची आई तिथे गेली. दत्तात्रय काहीच बोलत नसल्याने त्यांनी त्याला उपचारासाठी दवाखान्यात नेले. रुग्णालयात नेले असता डॉक्टरांनी दत्तात्रय याला तपासले असता त्याचा मृत्यू झाल्याचं सांगण्यात आलं. दरम्यान या घटनेची तक्रार मृतकाचे आई तुळसाबाई रूपलाल ढवळे यांनी पोलीस स्टेशनला दिली. दत्तात्रय यांच्या आईच्या तक्रारीनुसार, दत्तात्रय यांची पत्नी मिरा आणि तिचा प्रियकर एजाज खान याला पोलिसांनी अटक केली आहे. दोघांनाही अटक करून पोलीस अधिक तपास करत आहेत.
