सोलापूर (वृत्तसंस्था) बार्शी तालुक्यातील जामगाव (आ) येथे पतीने पत्नीच्या डोक्यात खलबत्याचा दगड घालून खून करत स्वतःही गळफास लावून आत्महत्या केल्याचा प्रकार घडला. दरम्यान, या दांम्पत्यांच्या दीड वर्षाच्या चिमुकलीच्या रडण्याच्या आवाजाने ही धक्कादायक घटना उघडकीस आली. ही घटना शुक्रवार, १ सप्टेंबर रोजी रात्री १० ते शनिवार, २ सप्टेंबर २०२३ रोजी सायंकाळी ६ वाजण्याच्या दरम्यान घडली. गंगाबाई धनाजी गायकवाड (वय ३५), असे खून झालेल्या महिलेचे तर धनाजी संभाजी गायकवाड (वय ४०), असे आत्महत्या केलेल्या पतीचे नाव आहे.
जामगाव (आ) येथे गायरान जमीन नजीक मयत गायकवाड दाम्पत्य दीड वर्षाच्या चिमुकलीसह राहत होते. शनिवारी सायंकाळी ६ वाजण्याच्या सुमारास त्या चिमुकलीचा मोठमोठ्याने रडण्याचा आवाज घराशेजारी राहणाऱ्या लोकांच्या कानावर पडला. त्यामुळे त्यांनी गायकवाड यांच्या घराकडे जावून पाहिले असता घरातून लहान मुलीचा रडण्याचा आवाज येत होता. परंतु दरवाजाला आतून कडी लावलेली होती. तसेच घरातून दुर्गंधी देखील सुटली होती. तेव्हा, शेजारच्यांनी दरवाजा तोडून आत प्रवेश केला असता गंगाबाई गायकवाड ह्या रक्ताच्या थारोळ्यात पडलेल्या तर धनाजी गायकवाड हे गळफास घेवून लटकलेल्या अवस्थेत होता.
दरम्यान, शेजाऱ्यांनी ही घटना पोलीसांना कळवताच पोलीस पथक तात्काळ घटनास्थळी दाखल झाले. पोलिसांनी पंचनामा करून पती-पत्नीचे मृतदेह उत्तरीय तपासणीसाठी ग्रामीण रुग्णालयात पाठवले. पत्नी गंगाबाई गायकवाड हिचा खून करून स्वतः गळफास घेऊन आत्महत्या केल्याप्रकरणी धनाजी गायकवाड याच्यावर खुनाचा गुन्हा दाखल करण्याची प्रक्रिया तालुका पोलीस स्टेशनमध्ये रात्री उशिरापर्यंत सुरू होती. या घटनेने जामगाव (आ) सह परिसरात हळहळ व्यक्त केली जात आहे. दरम्यान, खून आणि आत्महत्येचं नेमकं कारण समोर आलेले नाही.
