यवतमाळ (वृत्तसंस्था) चहा पिण्यासाठी घरी बोलावून जावायाने चाकूने सपासप वार करीत पोलीस पाटलाची निर्घृण हत्या केल्याची खळबळजनक घटना शुक्रवारी कळंब तालुक्यातील खुदावंतपूर येथे घडली. राजेश नानाजी कोल्हे (५४) रा. खुदानपूर असे मृताचे तर विजय रामभाऊ खुडसंगे (६९) असे मारेकऱ्याचे नाव आहे. पोलिसांनी आरोपीस अटक केली आहे.
याबाबत मृतकाचा मुलगा अनिकेत राजेश कोल्हे (२२) रा. खुदानपूर, याने कळंब पोलीस स्टेशनला तक्रार दिली आहे. पोलिस पाटील संघटनेचे सहसचिव असलेले राजेश कोल्हे व आरोपी विजय खुडसंगे नातेवाईक आहेत. दोघंही शेजारी शेजारीच राहतात. मारेकरी विजय व त्यांच्या पत्नीमध्ये नेहमी लहानसहान गोष्टीवरून वाद व्हायचा. त्यांच्यात समेट घडविण्याचा प्रयत्न राजेश कोल्हे नेहमी करायचे ही मध्यस्थी विजय खुडसंगे यांना आवडत नव्हते. त्यामुळे विजय खुडसंगे हा अधूनमधून दारू पिऊन मृतकाशी वाद घालत होता.
१० नोव्हेंबर रोजी सकाळी ११ वाजताच्या सुमारास मृतकाचा मुलगा घरासमोर दुचाकी धूत होता. तर मृतक प्रफुल्ल भोवरसह उभे होते. यावेळी आरोपीने मृतकाला चहा घेण्यासाठी घरी बोलाविले. त्यानंतर विजय खुडसंगेच्या घरातून मृतकाचा ‘मला चाकू खुपसला अनिकेत’ असा आवाज आला. त्यावरून मृतकाचा मुलगा व प्रफुल्ल भोयर धावत घटनास्थळी धावत गेले. यावेळी मारेकऱ्याने आतून दरवाजा लावून घेतला होता. यावेळी घरात मृतकावर वार करीत होता.
लाथा मारून दरवाजा उघडल्यानंतर विजय खुडसंगे हा मृतकावर चाकूचे वार करीत असताना दोघांनी वाचविण्यासाठी मध्यस्ती केली. यामध्ये अनिकेतच्या हाताला चाकूचा वार बसला. प्रफुल्लने चाकू हिसकावून घेतला व गंभीर अवस्थेत पडून असलेल्या पोलीस पाटलाला तातडीने कळंब ग्रामीण रुग्णालयात आणले. यावेळी डॉक्टरांनी तपासणी करून मृत घोषित केले. याबाबत कळंब पोलीस स्टेशनला तक्रार देण्यात आली. याप्रकरणी पोलिसांनी गुन्ह्याची नोंद करून आरोपीला अटक केली. पुढील अधिक तपास ठाणेदार दीपमाला भेंडे यांच्या मार्गदर्शनाखाली सुरू आहे. याबाबतचे वृत्त स्थानिक माध्यमांनी दिले आहे.
