जळगाव (प्रतिनिधी) निवासी उपजिल्हाधिकाऱ्यांवर हल्ला करणाऱ्या वाळूमाफीयांची पोलीस कोठडी आज संपली. त्यांना न्यायालयात आणत असतांना आकाशवाणी चौकात पोलिसांचे वाहन अचानक बंद पडले. त्यामुळे पोलिसांनी चौघ वाळूमाफियांची आकाशवाणी चौक ते जिल्हा न्यायालयापर्यंत पायी धिंड काढली. हातात बेड्या असलेल्या हल्लेखोरांची एक प्रकारे शहरातून धिंडच निघाली.
उपजिल्हाधिकारी कासार यांच्यावर केला होता प्राणघातक हल्ला !
अवैध वाळू वाहतुकीविरुद्ध दि. ६ फेब्रुवारी रोजी रात्री निवासी उपजिल्हाधिकारी सोपान कासार हे कारवाई करण्यासाठी गेलेले होते. यावेळी कारवाई करतांना वाळू माफियांनी त्यांच्याव प्राणघातक हल्ला केला होता. त्यानंतर सर्व हल्लेखोर पसार झाले होते. सुरुवातीला या प्रकरणी नऊ जणांविरुद्ध गुन्हा दाखल करण्यात आला. त्यानंतर पोलिसांच्या चौकशीत आणखी सात असे एकूण १६ जणांविरुद्ध गुन्हा दाखल करण्यात आला होता.
संशयितांना एकामागून एका अटक !
गुन्हा घडल्यानंतर विठ्ठल पाटील व गौतम पानपाटील यांना अटक करण्यात आली होती. त्यानंतर मुख्य संशयित विशाल उर्फ विक्की उर्फ मांडवा नामदेव सपकाळे (वय २८, रा. शंकरराव नगर) याला शनिवार, १० फेब्रुवारी रोजी स्थानिक गुन्हे शाखेच्या पथकाने पाचोरा येथून ताब्यात घेत नशिराबाद पोलिसांच्या ताब्यात दिले होते. त्याच दिवशी मयूर दिनकर पाटील (वय २५, साकेगाव ता. भुसावळ) याला नशिराबाद पोलिसांनी साकेगाव येथून अटक केली होती.
चौघांना केले न्यायालयात हजर !
अटकेत असलेल्या विशाल उर्फ मांडवा सपकाळे व मयूर पाटील या दोघांची पोलिस कोठडीची मुदत शुक्रवारी संपल्यानंतर त्यांना न्यायालयात हजर करण्यात येणार होते. तसेच दि. १५ फेब्रुवारी रोजी संदीप गणेश ठाकूर (वय ३०, रा. डीएनसी कॉलेजजवळ) व अक्षय नामदेव सपकाळे (वय ३०, रा. शंकरराव नगर) यांना अटक केल्यानंतर त्यांना देखील न्यायालयात हजर केले जाणार होते.
हल्लेखोर लपवित होते चेहरे !
आकाशवाणी चौकापासून काढली धिंड हल्लेखोर वाळूमाफियांची हातात बेड्या घालून रस्त्याने धिंड काढल्याने नागरिक त्यांच्याकडे उत्सुकतेने बघत होते. पुण्यात सराईत गुन्हेगारांप्रमाणेच या वाळूमाफियांची धिंड काढल्याने हे हल्लेखोर मान खाली घातून तर आपला चेहरा हाताने झाकून तोंड लपवित होते.
