पंढरपूर (वृत्तसंस्था) अजित पवार गटाचे मंत्री अनिल पाटील हे पुन्हा विधानसभेवर निवडून आलेले दिसणार नाहीत, असा मोठा दावा राष्ट्रवादीचे नेते शरद पवार यांनी केला आहे. यामुळे अजित पवार गटाच्या वर्तुळात खळबळ उडाली आहे.
हिवाळी अधिवेशनानंतर अजित पवार आणि शरद पवार हे दोन्ही राष्ट्रवादीचे नेते एकत्र आलेले दिसतील, असे विधान अजितदादा गटाचे मंत्री अनिल पाटील यांनी केले होते. त्यावर शरद पवार यांना विचारले असता त्यांनी अनिल पाटील यांच्यावर निशाना साधत ते पुन्हा विधानसभेवर निवडून आलेले दिसणार नाहीत; असा दावा केला.
शरद पवार पुढे म्हणाले की, नुकताच अमळनेर विधानसभा मतदार संघाचा दौरा केला आहे. मतदार संघातील लोकांशी मी बोललो तेव्हा तेथील लोकांमध्ये मंत्री अनिल पाटील पाटील यांच्याबाबत नाराजीचा सूर आहे. त्यामुळे अनिल पाटील हे पुन्हा निवडून येणार नाहीत. अगदी पुढच्या विधानसभेला ते निवडून आलेले दिसणार नाहीत. त्याची आम्ही काळजी घेऊ, असेही पवार म्हणाले. शरद पवारांच्या या दाव्यामुळे अजित पवार गटात मोठी खळबळ उडाली आहे. दरम्यान, अजित पवार गटाकडून शरद पवार यांच्या दाव्याबाबत अद्यापतरी कुणीही प्रतिउत्तर दिलेले नाही.
यावेळी शरद पवार यांनी आमदार बबनदादा शिंदे यांनाही मोठा इशारा दिला. इथल्या नेत्याने शेतकऱ्यांच्या नावावर कर्ज काढले. त्याबाबत माझ्याकडे कागदपत्रे द्या. ती कागदपत्रे घेऊन आल्यावर मी त्याचा जो बंदोबस्त करायचा तो बंदोबस्त करतो, अशा इशारा शरद पवारांनी दिला. इथले नेतृत्व काही जणांवर दबाव आणत आहे. मात्र त्या दबावाला झुगारून आपण काम करूयात, असंही शरद पवार यावेळी म्हणाले.
