भोर (वृत्तसंस्था) डोंगररांगांमधील रस्त्यावर धुक्याचा अंदाज न आल्याने ३०० फूट खोल नीरा-देवघर धरणात कार पडून कोकणात पर्यटनासाठी निघालेले चार तरुण बुडाले. ही घटना भोर तालुक्यातील वरंधा घाटमार्गे महाडकडे जाताना वरवंड-शिरगाव हद्दीतील घोडेमैदान वळणावर शनिवारी घडली. यात एक जण बचावला असून, दोघांचे मृतदेह सापडले आहेत. तर एकाचा मृतदेह शोधण्याचे काम उशिरापर्यंत सुरू होते.
हर्षप्रीत हरिप्रीतसिंग बांबा (३०, रा. पाषाण, पुणे, मूळ रा. जबलपूर, मध्य प्रदेश), अक्षय रमेश धाडे (२७, रा. रावेत, पुणे) अशी मृतांची नावे असून, संकेत विरेश जोशी (रा. बाणेर पुणे) हा बचावला आहे. तर स्वप्निल परशुराम शिंदे (२८, रा. हडपसर, पुणे) याचा शोध लागलेला नाही. मारुती बलेनो या गाडीतून पुण्यातील काही तरुण ट्रेकिंगसाठी भोर तालुक्यातील वरंधा घाटमार्गे कोकणात निघाले होते. घाटातील शिरगाव-वरवंड हद्दीतून जात तीव्र वळणावर धुक्याचा अंदाज न आल्याने, तसेच चालकाचा गाडीवरील ताबा सुटल्याने कार ३०० फूट खोल असलेल्या नीरा-देवघर धरण पात्रात कोसळली. यातून संकेत जोशी हा तरुण गाडीतून बाहेर फेकला गेल्याने बचावला. तर अक्षय घाडे, स्वप्निल शिंदे आणि हर्षप्रीत हे गाडीतच अडकले.
अपघाताची माहिती मिळताच भोईराज जल आपत्ती पथक, सह्याद्री रेस्क्यू फोर्स भोर- पुणे, परिविक्षाधीन पोलीस उपअधीक्षक रेखा याणी, प्रांताधिकारी राजेंद्र कचरे, तहसीलदार सचिन पाटील, शिरगाव, वरवंड, कोंढरी येथील पोलीस पाटील व स्थानिक ग्रामस्थ, पोलीस उपनिरीक्षक श्रीकांत जाधव, पोलीस हवालदार दत्तात्रय खंगरे, उद्धव गायकवाड, विकास लगस, अतुल मोरे, सादिक मुलाणी, भीमराव नखांबे यांनी तत्काळ घटनास्थळी पोहोचून शोधकार्य सुरू केले. यात हर्षप्रीत बांबा व अक्षय घाडे यांचे मृतदेह पाण्यातून बाहेर काढले, तर स्वप्निलचा शोध सुरू होता. जखमी तरुणावर भोर येथे रुग्णालयात उपचार सुरू आहेत.
स्थानिकांमुळे अपघाताची तत्काळ माहिती अपघात घडल्यानंतर काही वेळातच संकेत जोशी जखमी अवस्थेत रस्त्यावर आला. स्थानिक ग्रामस्थांकडे मदत मागितली. शिरगाव, बारखंड, कोंढरी येथील स्थानिक ग्रामस्थांनी प्रशासकीय यंत्रणेला तत्काळ माहिती देऊन माडीत अडकलेल्या व्यक्तींना वाचवण्याचा प्रयत्न केला.
