बुलढाणा (वृत्तसंस्था) रस्त्याच्याकडेला गाढ झोपेत असलेल्या भरधाव ट्रॅकने दहा मजुरांना चिरडल्याची हृदयद्रावक घटना राष्ट्रीय महामार्गावर खामगाव-मलकापूर दरम्यान वडनेर गावाजवळ घडली. या अपघातात चार जणांचा मृत्यू झाला असून सहा जण गंभीर जखमी आहेत.
बुलढाणा जिल्ह्यातील राष्ट्रीय महामार्ग क्रमांक सहावर मलकापूरनजीक वडनेर भोलजी या गावाजवळ मध्य प्रदेशातून महामार्गाच्या कामासाठी आलेल्या मजुरांना भरधाव ट्रकने चिरडलं. हे सर्व मजूर महामार्गाच्या बाजूला झोपलेले होते. या अपघातात तीन मजूरांचा जागीच मृत्यू झाला तर एकाच रुग्णालयात मृत्यू झाला. प्रकाश धांडेकर, पंकज जांभेकर, अभिषेक जांभेकर अशी तीन मृतांची नावे असून एकाची ओळख अद्याप पटलेली नाही.
या अपघातात सहा मजूर हे जखमी झाले असून यातील तिघांची प्रकृती चिंताजनक असून या सर्वांवर मलकापूर येथील शासकीय रुग्णालयात उपचार सुरू आहे. हे सर्व मजूर गेल्या आठवड्यात मध्य प्रदेशातून महामार्गाच्या कामावर मजुरी करण्यासाठी या ठिकाणी आले होते. सकाळी साडेपाच वाजता हे सर्व मजूर झोपलेले असताना यांना भरधाव ट्रकने चिरडलं. या अपघातानंतर संपुर्ण रस्त्यावर रक्ताचा सडा पडलेला आहे. जखमी आणि मृतांची ओळख पटवण्याचे काम सुरू आहे. दरम्यान, चालकाचे ट्रकवरील नियंत्रण सुटल्याने हा अपघात घडल्याची प्राथमिक माहिती समोर येत आहे.
