जळगाव (प्रतिनिधी) शहरातून जाणाऱ्या कानळदा रस्त्यावर आज पहाटे भीषण अपघात झाला. के.सी.पार्कजवळ ट्रॅक्टरने कारला जोरदार धडक दिल्याने कारमधील दोघेजण जागीच ठार झाले. तर अन्य एक महिला व पुरुष जखमी झाले असून दोघांना तात्काळ रुग्णालयात हलविण्यात आले.
यासंदर्भात अधिक असे की, आज पहाटे भादली येथील पाटील कुटुंबीय नातेवाईकाला भेटण्यासाठी भोकर येथे कार (क्रमांक एम एच १४ एफ सी ४५५०) ने जात होते. चालक बंडू पाटील होते. कानळदा रस्त्यावरील के.सी. पार्क जकात नाक्याजवळ समोरून भरधाव येणाऱ्या लाकडाने भरलेल्या ट्रॅक्टरने या कारलाजोरदार धडक दिली. अपघातात कारचा पुढील भाग चेन्दामेन्दा झाला असून चालकासह एक महिला जागीच ठार झाली. जखमी झालेली अन्य महिला व पुरुषाला जिल्हा शासकीय वैद्यकीय महाविद्यालय रुग्णालयात दाखल करण्यात आले आहे. घटनास्थळी नागरिकांची गर्दी जमली त्यांनीच जखमींना बाहेर काढले. या अपघाताची माहिती कळताच पोलिसांनी घटनास्थळी धाव घेतली.
