जळगाव (प्रतिनिधी) म्हशी चारण्यासाठी गेलेल्या पाच बहीणींचा एकुलत्या एक भावाचा मुर्दापूर धरणात बुडून मृत्यू झाल्याची हृदयद्रावक घटना शनिवारी दुपारी दीड वाजेच्या सुमारास उघडकीस आली. हर्षल अशोक चौधरी (वय १४, रा. नशिराबाद, ता. जळगाव), असे मयत मुलाचे नाव आहे. दरम्यान, पाच बहीणींचा एकुलत्या एक भावाचा दुर्देवी मृत्यू झाल्याने कुटुंबियांनी काळीज चिरणारा आक्रोश केला होता.
म्हशी चारण्यासाठी गेला होता धरणाच्या परिसरात !
जळगाव तालुक्यातील नशिराबाद येथे वास्तव्यास असलेला हर्षल चौधरी याने इयत्ता आठवीची परिक्षा दिली होती. तो गावातीलच इंग्लिश मिडीयम स्कुलमध्ये शिकत होता. हर्षलचे आई वडील हातमजूरी करुन कुटुंबाचा उदनिर्वाह करतात. घरची परिस्थिती अत्यंत बिकट असल्याने आणि तसेच शाळेला सुद्धया असल्यामुळे हर्षल हा गावातील काही जणांच्या म्हशी घेवून चरण्यासाठी गावाजवळ असलेल्या मुर्दापूर धरणाच्या परिसरात जात होता. आज देखील तो म्हशींना चरण्यासाठी घेवून गेला होता. मात्र, सकाळपासून पडणाऱ्या रणरणत्या उन्हामुळे अंगाची लाहीलाही होत असल्याने हर्षल हा पोहण्यासाठी धरणाच्या पाण्यात उतरला. मात्र त्याला धरणाच्या खोलीचा अंदाज न आल्यामुळे तो पाण्यात बुडू लागला. काही मिनिटात हर्षलच्या नाका तोंडात पाणी जावून त्याचा दुर्देवी मृत्यू झाला. तपासणी करीत हर्षल यास मयत घोषीत केले. याप्रकरणी पोलिसात अकस्मात मृत्यूची नोंद करण्यात आली आहे.
पाच बहिणींचा एकुलता एक भाऊ
धरणाच्या पाण्यात बुडालेला हर्षल हा पाच बहिणींचा एकुलता एक भाऊ होता. त्याची लहान बहिण गतीमंद असून त्याच्या कुटुंबाची आर्थिक परिस्थिती अंत्यंत बेताची आहे. एकुलत्या एक मुलावर काळाने झडप घातल्यामुळे त्याच्या कुटुंबियांवर दुःखाचा डोंगर कोसळला असून त्याच्या कुटुंबियांना मानसिक धक्का देखील बसला आहे. त्याच्या पश्चात आई, वडील, पाच बहिणी असा परिवार आहे.
