भंडारा (वृत्तसंस्था) प्रेमसंबंधात अडसर ठरत असल्यामुळे पत्नीने प्रियकराच्या मदतीने पतीचा गळा आवळून खून केला. तसेच पुरावा नष्ट करण्याच्या उद्देशाने पतीचा मृतदेह जंगल शिवारातील नालीत नेऊन फेकला. आदेश मदन राऊत (३८, रा. गणेश वॉर्ड, साकोली) असे मृत पतीचे नाव आहे. ही खळबळजनक घटना बुधवारी (१३ डिसेंबर) सकाळच्या सुमारास अड्याळ पोलीस ठाणे हद्दीतील माडगी जंगल शिवारात उघडकीस आली.
या प्रकरणी मृतक आदेशची आई सारिका मदन राऊत हिच्या तक्रारीवरून अड्याळ पोलिसांनी आदेशची पत्नी ज्योती राऊत (३५) व तिचा प्रियकर विक्की नत्थू करकाळे (३६, रा. आंबेडकर वॉर्ड, पवनी) या दोघांवर गुन्हा दाखल केला आहे. यात विक्कीला अटक करण्यात आली आहे. आदेशची पत्नी ज्योती व विक्की करकाळे यांच्यात कथित प्रेमसंबंध होते.
आदेश त्यांच्या प्रेमसंबंधात अडसर ठरत होता. त्याचा काटा काढण्याच्या उद्देशाने ज्योती आणि तिचा प्रियकर विक्कीने संगनमत करून प्रथम आदेशचा गळा आवळून खून केला. त्यानंतर पुरावा नष्ट करण्याच्या उद्देशाने दोघांनीही आदेशचा मृतदेह अड्याळ पोलीस ठाणे हद्दीत येणाऱ्या तिरींजवळच्या माडगी जंगल शिवारातील नालीमध्ये नेऊन फेकून दिला.
घटनेची माहिती मिळताच अड्याळ पोलिसांनी तपासाची चक्रे फिरविली आणि अवघ्या काही तासांतच मृत आदेशची पत्नी ज्योती व तिच्या प्रियकराचा छडा लावला. पोलिसी खाक्या दाखविताच प्रेम प्रकरणातून आदेशचा गळा आवळून खून केल्याची बाब समोर आली. पोलिसांनी ज्योती राऊत व विक्की करकाळे यांच्याविरुद्ध भादंविच्या कलम ३०२, २०१, ३४ अन्वये गुन्हा दाखल केला आहे.
