नवी दिल्ली (वृत्तसंस्था) केंद्र सरकारने बुधवारी छोट्या बचत योजनांवरील व्याजदरात कपात करण्याचा निर्णय घेतला होता, परंतु या निर्णयाने अनेक सर्वसामान्यांना मोठा झटका बसला. अनेक स्तरातून केंद्र सरकारच्या निर्णयावर नाराजी व्यक्त करण्यात आली. त्यानंतर या निर्णयावर केंद्र सरकारने यू टर्न घेत हा निर्णय परत घेत असल्याची घोषणा केली आहे. अर्थमंत्री निर्मला सीतारामन यांनी ट्वीट करत याबद्दलची माहिती दिली आहे.
पीपीएफसह (PPF) सगळ्या ठेवींवरील व्याजदर आधीप्रमाणेच राहाणार असल्याचं अर्थमंत्र्यांनी जाहीर केलं आहे. याआधी जारी करण्यात आलेले आदेश मागे घेण्यात येत असल्याची माहितीही त्यांनी आपल्या ट्वीटद्वारे दिली आहे. छोट्या बचत योजनांमध्ये पीपीएफ, सुकन्या समृद्धी अशा सर्व लहान बचत योजनांचे व्याज दर कमी करण्यासाठी सरकारने ३१ मार्च रोजी घोषणा केली आणि आज हा निर्णय मागे घेण्यात आला आहे. अर्थमंत्री निर्मला सीतारमण यांनी सरकारच्या या निर्णयाची माहिती स्वतःच्या ट्विटर अकाऊंटवरून दिली आहे.
१ एप्रिलपासून सेव्हिंग डिपॉझिटवर ३.५ टक्के, एका वर्षाच्या डिपॉझिटवर ४.४ टक्के, २ वर्षांच्या डिपॉझिटवर ५ टक्के आणि ५ वर्षांच्या डिपॉझिटवर ५.८ टक्के व्याज देण्यात येईल, तसंच पीपीएफवर ६.४ टक्के व्याज मिळेल, असं जाहीर करण्यात आलं होतं. सगळ्या ठेवींवरील व्याजदरात सरासरी एक टक्का घट करण्याचा निर्णय सरकारनं घेतला होता. हे दर १ एप्रिल २०२१ ते ३० जून २०२१ या तिमाहीसाठी लागू होणार होते. कोरोनाच्या संकटामुळे देशातली अर्थव्यवस्था अडचणीत आली आहे, त्यामुळे सरकारच्या उत्पन्नाचा स्त्रोतही आटला आहे, त्यामुळे व्याजदरांमध्ये कपात करण्याचा निर्णय घेण्यात आला होता. मात्र, आता हा निर्णय मागे घेण्यात आल्यानं ठेवीदारांना मोठा दिलासा मिळाला आहे.