लखनऊ (वृत्तसंस्था) तरूण – तरूणी दोघेही प्रेमात आकंठ बुडाले होते. दोघांनीही लग्न करून सुखी संसाराची स्वप्ने बघितली होती. मात्र, दोघेही लग्न करण्यासाठी पळून जात असताना दुचाकीला भीषण अपघात झाला आहे. या अपघातात प्रेयसीचा जागीच मृत्यू झाला आहे. तर प्रियकर तरुणही गंभीर जखमी झाला असून एका स्थानिक रुग्णालयात त्याच्यावर उपचार केले जात आहेत.
संबंधित घटना उत्तर प्रदेशातील पिलीभीत जिल्ह्याच्या जेहानाबाद येथील आहे. याच शहरात राहणाऱ्या २२ वर्षीय विद्यार्थिनीचं शेजारी राहणाऱ्या एका तरुणासोबत प्रेमसंबंध होते. दोघांनाही एकमेकांसोबत लग्न करायचं होतं. पण मुलाच्या कुटुंबीयांनी या लग्नाला विरोध दर्शवला होता. त्यामुळे शुक्रवारी सकाळी प्रियकराने प्रेयसीला भेटायला बोलावलं आणि लग्न करण्याच्या हेतून तिला पळवून नेलं. पण लग्न करण्यासाठी पळून जात असताना पिलीभीत जिल्ह्यातील गजरौला पोलीस ठाण्याच्या हद्दीतील जंगलातील एका झाडाला दुचाकी आदळून मोठा अपघात झाला आहे. या अपघातात प्रेयसी तरुणीचा जागीच अंत झाला आहे. तर प्रियकर तरुण गंभीर जखमी झाला आहे. संबंधित जखमी तरुणावर पिलीभीत येथील जिल्हा रुग्णालयात उपचार केले जात आहेत. या घटनेची माहिती मिळताच तरुणीच्या कुटुंबीयांनी रुग्णालयात जाऊन गोंधळ घातला आहे. तसेच प्रियकर तरुणाने प्रेयसीवर बलात्कार करून तिची हत्या केल्याचा आरोप मृत तरुणीच्या कुटुंबीयांनी केला आहे.
मृत तरुणीच्या नातेवाईकांच्या तक्रारीवरून पोलिसांनी प्रियकर तरुणाविरोधात गुन्हा दाखल केला आहे. तसेच मृत तरुणीच्या मृतदेहाची व्हिडीओग्राफी करत शवविच्छेदन केलं जाईल, अशी माहिती पोलिसांनी दिली आहे. या घटनेचा पुढील तपास पोलीस करत आहेत.
