चोपडा (प्रतिनिधी) शहरातील यावल रोडवर असलेल्या समर्थ ट्रेडर्स या दुकानात सोमवारी पहाटे अज्ञात ३ चोरटयांनी प्रवेश करून सुमारे ३ लाख रुपयांची रक्कम चोरून नेली आहे. याप्रकरणी चोपडा शहर पोलीस स्टेशनला गुन्हा दाखल करण्यात आला आहे. तर संपूर्ण घटना सीसीटीव्हीत कैद झाली आहे.
गोपाळ श्रीराम पाटील (रा. चोपडा शहर) यांनी याबाबत फिर्याद दिली आहे. त्यांचे यावल रस्त्यावर समर्थ ट्रेडर्स नावाचे प्रसिद्ध दुकान आहे. सोमवारी पहाटे तीन अज्ञात चोरटे दुचाकीवरून आले. त्यांनी तोंडाला रुमाल बांधलेला होता. दुकानाचे शटर वाकवून चोरटयांनी आतमध्ये प्रवेश केला. त्यानंतर दुकानातील २ लाख ९२ हजार रुपयांची रोकड चोरत तेथून पळ काढला. चोरीची ही संपूर्ण घटना सीसीटीव्हीत कैद झाली आहे.
घटनेची माहिती मिळताच दुकान मालक गोपाळ पाटील यांनी पोलिसांना माहिती दिली. चोपडा शहर पोलीस ठाण्यात अज्ञात चोरट्यांविरुद्ध गुन्हा दाखल केला आहे. पोलीस निरीक्षक के. के. पाटील यांनी घटनास्थळी भेट दिली असून सीसीटीव्ही फुटेजच्या आधारे चोरट्यांचा पोलीस शोध घेत आहेत. मागील महिन्याभरात हा तिसरी चोरी असून अद्याप एकाही चोरीचा तपास लागलेला नाही. त्यामुळे सामान्य जनमाणसात भीतीचे वातावरण निर्माण आहे. पुढील तपास एपीआय अजित सबाळे हे करीत आहेत.
